बारा। उज्यालो नेपाल पार्टीका अध्यक्ष कुलमान घिसिङले आफूहरूले उम्मेदवारी दिएका अधिकांश निर्वाचन क्षेत्रमा पार्टीले जित निकाल्ने दाबी गरेका छन्।
सिमरामा आयोजित कार्यक्रममा अध्यक्ष घिसिङले देशका विभिन्न निर्वाचन क्षेत्रमा उठाएका उम्मेदवारहरूले प्रतिस्पर्धामा उत्कृष्ट प्रदर्शन गर्ने विश्वास व्यक्त गर्दै काठमाडौं आसपासका क्षेत्रहरूमा विजयी हुने दाबी गरे। उनले भने, “हामीले १२१ निर्वाचन क्षेत्रमा उम्मेदवार उठाएका छौँ। धेरै स्थानमा जित सुनिश्चित हुनेछ भने, जहाँ नजित्ने सम्भावना छ, त्यहाँ पनि सक्दो प्रयास गर्दै प्रतिस्पर्धामा रहनेछौँ।”
अध्यक्ष घिसिङले जेनजी आन्दोलनपश्चात् जनता र देशको मागअनुसार रास्वपासँग सहमति गरेर सबै कुरा त्यागेर अघि बढेको स्मरण गर्दै, तर सो सहमति कार्यान्वयन हुन नसकेको उल्लेख गरे। उनले जनताको चाहना र राजनीतिक सहमतिलाई प्राथमिकता दिँदै पार्टीले राष्ट्र र जनताको हितमा काम गरिरहेको बताए।
विशेषगरी झापा–५ निर्वाचन क्षेत्रबारे कुलमान घिसिङले स्पष्ट पारे, “त्यहाँ हाम्रो पनि उम्मेदवारी छ। अब निर्णय गर्ने अधिकार पूर्ण रूपमा जनताको हो। जनताले जे निर्णय गर्छन्, त्यही हाम्रो लागि सम्माननीय हुनेछ।” उनले यो पनि जोड दिए कि पार्टीले चुनावी मैदानमा सबै स्थानमा सक्रिय रुपमा सहभागिता जनाइरहेको छ र मतदातासँग प्रत्यक्ष संवाद गरेर आफ्नो एजेन्डा, नीति र कार्यक्रम बुझाउने काम जारी राख्नेछ।
उक्त अवसरमा अध्यक्ष घिसिङले पार्टीको लक्ष्य स्पष्ट गर्दै भने, “हामी केवल जितको लागि होइन, लोकतन्त्र र जनताको विश्वास कायम राख्न पनि सबै क्षेत्रीय गतिविधि सञ्चालन गर्दैछौँ। निर्वाचन परिणाम चाहे जे भए पनि, हामी जनताको निर्णयको सम्मान गर्ने छौँ।”
यसअघि उज्यालो नेपाल पार्टीले देशभर १२१ स्थानमा उम्मेदवार उठाएको जानकारी सार्वजनिक गरेको थियो। अध्यक्ष घिसिङले आफूहरू प्रतिस्पर्धा गर्ने क्षेत्रहरूमा समान रूपमा प्रचार–प्रसार बढाएर मतदातासँग प्रत्यक्ष सम्पर्क गर्ने रणनीति अघि बढाएको पनि जानकारी दिए।
प्रकाशित मिति: १९ माघ २०८२, सोमबार
प्रतिक्रिया