बंगलादेश। बंगलादेशकी पूर्वप्रधानमन्त्री शेख हसिनालाई राजधानी ढाकास्थित पूर्वाचल न्यू टाउन सरकारी परियोजनामा २० कठ्ठा जग्गा अनियमित रूपमा बाँडफाँट गरेको आरोपमा दोषी ठहर गर्दै अदालतले १० वर्षको जेल सजाय सुनाएको छ।
ढाका विशेष न्यायाधीश अदालत–४ का न्यायाधीश रोबिउल आलमले सोमबार दुई फरक मुद्दामा प्रत्येकमा पाँच–पाँच वर्षको सजाय तोकेर कुल १० वर्षको कैद सुनाएका हुन्। उही मुद्दामा शेख हसिनाकी बहिनीकी छोरी तथा बेलायती सांसद टुलिप रिजवाना सिद्दिकलाई प्रत्येक मुद्दामा दुई–दुई वर्ष गरी कुल चार वर्षको जेल सजाय दिइएको छ।
त्यस्तै, अजमिना सिद्दिकलाई एक मुद्दामा सात वर्षको कैद, र शेख हसिनाका छोरा **रदवान मुजिब सिद्दिक (बोबी)**लाई पनि सात वर्ष जेल सजाय सुनाइएको छ।
टुलिप सिद्दिक शेख हसिनाकी भतिजी हुन् र पूर्व बेलायती मन्त्रीसमेत रहिसकेकी छन्। अदालतले यस मुद्दामा ३१ जना साक्षीको बयान लिएको थियो। भ्रष्टाचार निवारण आयोग (एसीसी) का सहायक निर्देशक अफनान जन्नत कियाले अन्तिम अभियोजन साक्षीका रूपमा बयान दिएका थिए।
भ्रष्टाचार निवारण आयोगले जनवरी १३, २०२५ मा १६ जनाविरुद्ध मुद्दा दायर गरेको थियो भने अनुसन्धानपछि मार्च १०, २०२५ मा १८ जनाविरुद्ध अभियोगपत्र दर्ता गरिएको थियो। अदालतले जुलाई ३१, २०२५ मा अभियोग निर्धारण गर्दै सुनुवाइ सुरु गरेको थियो।
यसैबीच, पूर्वाचल परियोजनाअन्तर्गत १० कठ्ठा जग्गा प्राप्त गर्न अधिकार दुरुपयोग र अनियमितता गरेको आरोपमा दायर अर्को मुद्दामा पनि यही अदालतले शेख हसिनासहित उनका भतिजा रदवान मुजिब सिद्दिक, भतिजी टुलिप सिद्दिक र अन्य १८ जनाविरुद्ध फागुन २ गते फैसला सुनाएको छ।
बंगलादेशमा सन् २०२४ जुलाई मा विद्यार्थी नेतृत्वमा भएको आन्दोलनपछि, अगस्ट ५ मा शेख हसिनाले भारतमा शरण लिएकी थिइन्। त्यसपछि नोबेल पुरस्कार विजेता मोहम्मद युनुसको नेतृत्वमा अन्तरिम सरकार गठन भई शेख हसिना, उनका मन्त्रिपरिषद् सदस्य तथा अवामी लिगका नेताहरूविरुद्ध कानुनी प्रक्रिया अघि बढाइएको थियो।
प्रकाशित मिति: १९ माघ २०८२, सोमबार
प्रतिक्रिया