काठमाडौं । नेपाली कांग्रेसका सभापति गगनकुमार थापा ले आगामी पाँच वर्ष राष्ट्र निर्माणमा केन्द्रित योजनासहित अघि बढ्ने प्रतिबद्धता व्यक्त गरेका छन्। बुधबार काठमाडौंमा बौद्धिक पेशाकर्मी अभियान परिषद द्वारा आयोजित अन्तरक्रियामा उनले यसअघि अवसर पाए पनि त्यसलाई पूर्ण रूपमा सदुपयोग गर्न नसकेको स्वीकार गर्दै अबको पाँच वर्षमा देशलाई कुनै दुर्घटनामा नपर्न दिने उद्देश्यसहित समग्र योजना अघि ल्याइएको बताए।
सभापति थापाले भने, “हाम्रो पार्टीको प्रतिज्ञा पत्रमा पाँच वर्षभित्र स्पष्ट परिणाम दिने योजना समावेश गरिएको छ। इतिहासका विभिन्न घटनाबाट प्रेरणा लिएर अहिलेको युवा पुस्ताले खोजेको जस्तो देश बनाउन कांग्रेसले जिम्मेवारी लिन चाहन्छ।”
उनले जोड दिए कि कांग्रेस नेपालमा सबैभन्दा पुरानो र अनुभवी पार्टी भएकाले यसको एजेण्डा तल्लो तहसम्म पुर्याउने क्षमता राख्दछ। यसै सन्दर्भमा उनले वर्तमान सुधार आवश्यकतालाई सम्बोधन गर्दै चुनावमा सुधारको ग्यारेन्टीसहित पार्टी अघि आएको बताएका छन्।
सभापति थापाका अनुसार, देश निर्माणको कार्यमा सबै राजनीतिक दलहरूको सहभागिता अनिवार्य छ। त्यसैले राष्ट्रिय नेतृत्वको भूमिका नेपाली कांग्रेसले निर्वाह गर्ने उनको भनाइ छ।
थापाले लोकतन्त्रलाई हाइज्याक हुनबाट बचाउने, नीति तथा योजना समयमै डेलिभरी गर्ने, र परिणाम सुनिश्चित गर्ने कुरामा कांग्रेस सक्षम रहेको पनि स्पष्ट पारे। उनले देशलाई स्थिर र प्रगतिशील मार्गमा अघि बढाउन पार्टीले सबै तहमा रणनीति र योजना लागू गर्ने प्रतिबद्धता जनाए।
यस कार्यक्रममार्फत सभापति थापाले पार्टीका आगामी रणनीतिहरू, युवापुस्तासँगको संवाद, र राष्ट्र निर्माणका लागि आवश्यक सुधारका उपायहरूबारे विस्तृत रूपमा जानकारी दिएका छन्। उनका अनुसार अबको पाँच वर्ष देशका लागि निर्णायक समय हुनेछ र कांग्रेसले यस अवधिमा जिम्मेवारीपूर्ण नेतृत्व प्रस्तुत गर्ने लक्ष्य राखेको छ।
प्रकाशित मिति: ६ फाल्गुन २०८२, बुधबार
प्रतिक्रिया