काठमाडौं । राष्ट्रिय स्वतन्त्र पार्टी (रास्वपा) ले अब चुनावी प्रचारका क्रममा आफ्नो चुनाव चिह्न ‘घण्टी’ बजाउँदै भोट माग्न नपाउने भएको छ। प्रतिनिधिसभा निर्वाचन नजिकिँदै गर्दा निर्वाचन आयोग नेपाल ले चुनाव चिह्नको भौतिक स्वरूप प्रयोग नगर्न/नगराउन निर्देशन दिएको हो।
आयोगका अनुसार केही दल तथा उम्मेदवारले प्रचारप्रसारका क्रममा चुनाव चिह्नकै भौतिक वस्तु बोकेर हिँड्ने र प्रयोग गर्ने गरेका कारण जनशान्ति तथा व्यवस्थापनमा असर परेको भन्ने गुनासा आएका थिए। त्यसपछि आयोगले सबै दल र उम्मेदवारलाई यस्तो अभ्यास रोक्न आग्रह गरेको जनाएको छ।
यसअघि रास्वपाका उम्मेदवार तथा कार्यकर्ताले घरदैलो र सभामा घण्टी बजाउँदै मत माग्ने शैली अपनाउँदै आएका थिए। अब भने यस्तो तरिकाले प्रचार गर्न नपाइने स्पष्ट गरिएको छ।
आयोगका प्रवक्ता नारायणप्रसाद भट्टराईका अनुसार निर्वाचन आचारसंहिता प्रभावकारी रूपमा कार्यान्वयन गर्न र समान प्रतिस्पर्धा सुनिश्चित गर्न यस्तो निर्देशन जारी गरिएको हो। आगामी फागुन २१ गते प्रतिनिधिसभा निर्वाचन हुँदैछ।
प्रकाशित मिति: १० फाल्गुन २०८२, आइतबार
प्रतिक्रिया