धनुषा । धनुषा जिल्लाको जनकपुर उपमहानगरपालिका–४ स्थित मुरलीचोकमा आज भएको सवारी दुर्घटनामा एक ट्राफिक प्रहरीको मृत्यु भएको छ। जिल्ला प्रहरी कार्यालय धनुषाका अनुसार दुर्घटनामा मोटरसाइकल चालक ट्राफिक प्रहरी हवल्दार चन्द्रकला महतोको घटनास्थलमै ज्यान गएको हो।
महतो जिल्ला ट्राफिक प्रहरी कार्यालय महोत्तरीमा कार्यरत थिए। प्रहरीका अनुसार भ्रमरपुराचोकबाट मुरलीचोकतर्फ आउँदै गरेको प्रदेश २–०३–००१ प ०१०४ नम्बरको टिपरले विपरीत दिशाबाट आइरहेको प्रदेश २–०२–००२ प ७३५२ नम्बरको पल्सर मोटरसाइकललाई ठक्कर दिएको थियो। दुर्घटनाबारे जानकारी दिँदै जिल्ला ट्राफिक प्रहरी कार्यालय धनुषाका प्रमुख सूर्यबहादुर शाहीले ठक्करपछि मोटरसाइकल चालक गम्भीर घाइते भएको र उपचारका क्रममा उनको मृत्यु भएको बताए।
मृतक महतोको शव परीक्षणका लागि प्रादेशिक अस्पताल, जनकपुर पठाइएको प्रहरीले जनाएको छ।
दुर्घटनामा संलग्न टिपर चालकलाई नियन्त्रणमा लिइएको छ। साथै टिपर र मोटरसाइकल दुवै सवारी साधनलाई ट्राफिक प्रहरी कार्यालय जिरोमाइलको नियन्त्रणमा राखी थप अनुसन्धान भइरहेको प्रहरीले जानकारी दिएको छ।
प्रकाशित मिति: ११ फाल्गुन २०८२, सोमबार
प्रतिक्रिया