काठमाडौँ । काठमाडौँको बुढानीलकण्ठ नगरपालिका–२ स्थित चपली क्षेत्रमा शंकास्पद वस्तु फेला परेको छ। चपलीबाट माथिल्लो भंगालतर्फ जाने भित्री सडकमा कागजले बेरिएको र तार जडान गरिएको प्रेसर कुकर देखिएपछि स्थानीयले प्रहरीलाई खबर गरेका थिए।
जिल्ला प्रहरी परिसर काठमाडौँका एसपी पवन भट्टराईका अनुसार उक्त वस्तु बम हो वा नक्कली (होक्स) हो भन्ने विषयमा यकिन हुन बाँकी छ। मध्यराति फेला परेको उक्त शंकास्पद वस्तुलाई बुधबार बिहान नेपाली सेनाले निष्क्रिय पार्ने तयारी गरेको छ।
घटनास्थलमा सेनाको बम डिस्पोजल टोली पुगेर डिस्पोज गर्ने प्रयास गरिरहेको छ। चपलीस्थित मसला फ्याक्ट्रीबाट चुनीखेल जाने सडक खण्डमा उक्त वस्तु भेटिएपछि रातभर सो क्षेत्रमा सुरक्षाकर्मीले आवतजावत बन्द गराएका थिए।
बम निष्क्रिय पार्न सेनाको चन्दननाथ गणबाट १५ सदस्यीय टोली परिचालन गरिएको छ। घटनास्थलमा नेपाल प्रहरी र सशस्त्र प्रहरी बलका सुरक्षाकर्मी पनि तैनाथ रहेका छन्।
प्रकाशित मिति: २० फाल्गुन २०८२, बुधबार
प्रतिक्रिया