काठमाडौ । जेनजी अभियन्ता मिराज ढुंगानाले बुधबार साँझ सामाजिक सञ्जालमा राजनीतिक दलहरू र उनीहरूको समर्थनमा देखिएको अन्धभक्तिको प्रवृत्तिबारे कडा कटाक्ष गरेका छन् ।
केही दिनअघि सर्लाही पुगेर नेपाली कांग्रेसका महामन्त्री गगन थापालाई सघाउने निर्णय गरेपछि उनलाई कांग्रेस प्रवेश गरेको भनी सर्वत्र चर्चा भइरहेको सन्दर्भमा ढुंगानाको यो भनाइ आएको हो ।
आफ्नो लामो पोस्टमा ढुंगानाले रास्वपालाई नयाँ र कांग्रेसलाई पुरानो दल भनिए पनि संगठन र इतिहासको हिसाबले मात्र यो फरक हुने बताएका छन् । उनले अवस्था र परिस्थितिले धेरै कुरा परिवर्तन गर्ने उल्लेख गर्दै ‘सबै नराम्रा मान्छे एउटै पार्टीमा हुँदैनन्’ भन्ने तर्क राखेका छन् ।
समस्या प्रायः नेतृत्वमा हुने उनको भनाइ छ । उनले अन्य दलमा जस्तै रास्वपाका नेताहरू पनि विवादमुक्त नरहेको स्पष्ट पारेका छन् ।
राम्रो कामलाई राम्रो भन्न पाउनुपर्ने आफ्नो अधिकारको वकालत गर्दै ढुंगानाले कांग्रेसको समर्थन गरेको भन्दै ‘कतिमा बिक्यौ ?’ भनेर गाली गर्नेहरूलाई सोही प्रश्न फिर्ता गरेका हुन् । उनले विचार राख्नु कुनै अपराध नभएको र अन्धभक्त हुनुभन्दा सच बोल्न सक्नु नै साहस भएको बताएका छन् ।
प्रकाशित मिति: २० फाल्गुन २०८२, बुधबार
प्रतिक्रिया