काठमाडौं। बूढानीलकण्ठ नगरपालिका–२ चपली मतदान केन्द्रमा १०५ वर्षीय ज्येष्ठ नागरिक चन्द्रबहादुर खड्काले पहिलो मतदाताका रूपमा मतदान गरेका छन् ।
बिहान मतदान केन्द्र पुगेका खड्काले मत खसालेपछि सञ्चारकर्मीलाई दिएको संक्षिप्त प्रतिक्रियामा भने, “यो उमेरमा पनि मतदान गर्न पाउँदा खुसी लागेको छ । देशले योग्य, इमानदार र जनताका पक्षमा काम गर्ने जनप्रतिनिधि पाओस् भन्ने मेरो कामना छ ।”
खड्काको यो सहभागिताले लोकतन्त्रप्रति नागरिकको जिम्मेवारी र कर्तव्यबोध गराएको स्थानीय सञ्चारकर्मी अनिता श्रेष्ठले बताइन् । मतदान केन्द्रमा लामबद्ध मतदाताहरूले उनीप्रति विशेष सम्मान प्रकट गरेका थिए । धेरैले उनीसँग फोटो खिचेर मतदानको यो क्षणलाई स्मरणीय बनाएका छन् ।
फागुन २१ गते हुने प्रतिनिधिसभा सदस्य निर्वाचनमा मतदान जारी छ । प्रारम्भिक जानकारीअनुसार देशभर मतदान केन्द्रहरूमा मतदाताको उत्साहजनक उपस्थिति रहेको छ । सुरक्षा व्यवस्था कडा पारिएको छ र निर्वाचन शान्तिपूर्ण रूपमा सञ्चालन भइरहेको प्रहरी तथा निर्वाचन आयोगले जनाएको छ ।
खड्काको मतदानले ज्येष्ठ नागरिकहरूको सक्रिय सहभागितालाई पनि उजागर गरेको छ । उनको यो कदमलाई मतदाता जागरणको सकारात्मक उदाहरणका रूपमा हेरिएको छ ।
प्रकाशित मिति: २१ फाल्गुन २०८२, बिहिबार
प्रतिक्रिया