झापा। झापा क्षेत्र नम्बर ५ मा दिउँसो साढे ३ बजेसम्म ५५ प्रतिशत मत खसेको छ । निर्वाचन अधिकृतको कार्यालयले दिएको जानकारीअनुसार मतदान केन्द्रहरूमा मतदाताको राम्रो उपस्थिति रहेको छ ।
बिहान ७ बजेदेखि सुरु भएको मतदान दिउँसो ५ बजेसम्म जारी रहनेछ । यस क्षेत्रमा यो पटकको निर्वाचन चौतर्फी चासोको विषय बनेको छ । विशेषगरी नेकपा एमालेका अध्यक्ष केपी शर्मा ओली र काठमाडौंका पूर्वमेयर एवं राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहबीचको प्रतिस्पर्धालाई निकै महत्वका साथ हेरिएको छ ।
झापा–५ मा मतदाताको उत्साहजनक सहभागिता रहेको छ । सुरक्षा व्यवस्था कडा पारिएको छ र मतदान शान्तिपूर्ण रूपमा भइरहेको प्रहरी तथा निर्वाचन अधिकृतको कार्यालयले जनाएको छ ।
मतदानपछि मतगणना सुरु हुने र प्रारम्भिक परिणामहरू राति नै आउन सक्ने अपेक्षा गरिएको छ । यो क्षेत्रको मतपरिणामले समग्र निर्वाचनको माहोललाई पनि प्रभाव पार्ने देखिन्छ ।
प्रकाशित मिति: २१ फाल्गुन २०८२, बिहिबार
प्रतिक्रिया