एजेन्सी। इरानमाथि अमेरिका र इजरायलको संयुक्त सैन्य आक्रमणको विरोध तथा युद्धविरामको माग गर्दै अमेरिकाका विभिन्न शहरहरूमा ठूलो प्रदर्शन भएको छ ।
न्यूयोर्कको म्यानहट्टनस्थित युनियन स्क्वायरमा हजारौं प्रदर्शनकारीहरू जम्मा भएका थिए । उनीहरूले ‘इरानमा युद्ध बन्द गर’, ‘इरानबाट हात हटाऊ’ र ‘युद्धविराम अबै’ जस्ता नारा लेखिएका प्लेकार्ड बोकेका थिए । प्रदर्शनकारीहरूले अमेरिकी सरकारलाई इजरायललाई दिएको सैन्य तथा कूटनीतिक समर्थन तत्काल रोक्न माग गरेका छन् ।
प्रदर्शनमा सहभागी एक प्रदर्शनकारी एड्रिनाले भनिन्, “मलाई आशा छ कि सबै देशहरू र अन्तर्राष्ट्रिय समुदायले युद्ध रोक्न इजरायल र संयुक्त राज्य अमेरिकालाई दबाब दिनेछन् । यो द्वन्द्वले आर्थिक क्षति मात्र होइन, मानवीय संकट पनि निम्त्याइरहेको छ ।”
फेब्रुअरी २८ गतेदेखि सुरु भएको अमेरिका–इजरायली आक्रमणले मध्यपूर्वलाई हिंसाको नयाँ चरणमा पुर्याएको छ । इरानले इजरायल र क्षेत्रभरिका अमेरिकी लक्ष्यहरूविरुद्ध श्रृंखलाबद्ध प्रतिआक्रमण गरिरहेको छ ।
संयुक्त राष्ट्रसंघका लागि इरानका राजदूत अमिर सईद इरावनीका अनुसार अमेरिका–इजरायली हवाई आक्रमणमा महिला र बालबालिका सहित कम्तीमा १,३३२ इरानी नागरिकको मृत्यु भएको छ भने हजारौं घाइते भएका छन् ।
प्रदर्शनकारीहरूले राष्ट्रपति डोनाल्ड ट्रम्प प्रशासनलाई इरानविरुद्धको सैन्य अभियान रोक्न तथा कूटनीतिक वार्तामार्फत समस्याको समाधान खोज्न आग्रह गरेका छन् । अमेरिकाका अन्य शहरहरूमा पनि यस्तै विरोध प्रदर्शनहरू भइरहेका छन् ।
यो द्वन्द्व छैटौं दिनमा पुगिसकेको छ । खाडी क्षेत्रमा कार्यरत नेपाली श्रमिकहरूको सुरक्षा जोखिममा परेको छ । नेपाल सरकारले उच्च सतर्कता अपनाउन तथा अनावश्यक यात्रा नगर्न आग्रह गरेको छ ।
प्रकाशित मिति: २४ फाल्गुन २०८२, आइतबार
प्रतिक्रिया