काठमाडौं । निर्वाचन आयोगले धनुषा–१ क्षेत्रबाट नेकपाका मातृका यादवलाई विजयी घोषणा गरेको छ।
यस क्षेत्रका रास्वपा उम्मेदवार किशोरी साह कमलको उम्मेदवारी खारेज भइसकेको र उनका पक्षमा अत्यधिक मत परेपछि विवाद उत्पन्न भएको थियो। तर निर्वाचन आयोगले दोस्रो स्थानमा रहेका मातृका यादवलाई नै निर्वाचित घोषणा गरेको हो।
पहिले निर्वाचन अधिकृतको कार्यालयले यादवलाई निर्वाचित प्रमाणपत्र प्रदान गरिसकेको थियो। सुरुमा प्रमाणपत्र नदिइएको कारण नेकपाले विरोध जनाएको थियो। आयोगले उम्मेदवारी खारेज भएकाले किशोरी साहको मत आधिकारिक वेबसाइटमा अद्यावधिक नगरेको बताइएको छ। त्यसैले यादव पहिलो स्थानमा रहेर विजयी भएका हुन्।
किशोरी साह कालो सूचीमा परेपछि उनका उम्मेदवारी खारेज गरिएको थियो। उनी तुरुन्तै अदालत पुगेकी थिइन् भने अदालतले उनको मुद्दामा शुक्रबार निर्णय गर्ने तयारी गरेको छ।
यससँगै निर्वाचन आयोगले देशभरका १६५ निर्वाचन क्षेत्रको मतपरिणामसहित विजेताको घोषणा सम्पन्न गरेको छ। समानुपातिक निर्वाचनको मतपरिणाम पनि गणना भइसकेको छ।
प्रकाशित मिति: २८ फाल्गुन २०८२, बिहिबार
प्रतिक्रिया