इरानको तेल नेटवर्कमाथि अमेरिकी आक्रमण, युद्ध बढ्दै

खार्ग टापु इरानको प्रमुख तेल निर्यात केन्द्रका रूपमा परिचित छ। ट्रम्पले अमेरिकी आक्रमणबाट टापुमा रहेका सैन्य संरचनाहरू ध्वस्त पारिएको दाबी गरेका छन्।

आवश्यक परे तेल पूर्वाधारलाई पनि निशाना बनाउन सकिने चेतावनी उनले दिएका छन्।

यसअघि इरानी संसदका अध्यक्ष मोहम्मद बाघेर कालीबाफले यस्ता आक्रमणले इरानबाट कडा प्रतिकार हुने चेतावनी दिएका थिए।

यसैबीच इरानको राजधानी तेहरानमा शुक्रबार ठूलो विस्फोट भएको छ।

विस्फोट त्यही क्षेत्रमा भएको थियो जहाँ हजारौँ मानिसहरूले वार्षिक प्यालेस्टिनी समर्थक र्‍यालीमा सहभागी भएर अमेरिका र इजरायलविरुद्ध नाराबाजी गरेका थिए। उ

क्त कार्यक्रममा केही उच्च सरकारी अधिकारीहरू पनि उपस्थित रहेको बताइएको छ। विस्फोटबाट मानवीय क्षति भने नभएको जनाइएको छ।

द्वन्द्व चर्किँदै जाँदा अमेरिकाले मध्यपूर्व क्षेत्रमा आफ्नो सैन्य उपस्थितिलाई थप सुदृढ बनाएको छ।

अमेरिकी सेनाको ३१औँ मरीन एक्सपेडिसनरी युनिट र उभयचर आक्रमण जहाज ट्रिपोलीलाई मध्यपूर्वतर्फ पठाइएको छ।

यी मरीन युनिटहरू उभयचर आक्रमण, दूतावास सुरक्षा, नागरिक उद्धार तथा विपद् राहतका कार्यमा विशेषज्ञ मानिन्छन्।

अमेरिकी अधिकारीहरूले यो तैनाथीले अनिवार्य रूपमा भू–आक्रमणको संकेत नगर्ने बताएका छन्।

यसअघि नै अमेरिकी नौसेनाले अरब सागर क्षेत्रमा एअरक्राफ्ट क्यारियर अब्राहाम लिङ्कनसहित आठ विध्वंसक जहाज र अन्य युद्धपोत परिचालन गरिसकेको थियो।

ट्रिपोली थपिएपछि क्षेत्रको सैन्य शक्ति अझ बलियो बनेको छ।

उता इरानले इजरायल र खाडी क्षेत्रका केही देशहरूलाई लक्षित गर्दै मिसाइल तथा ड्रोन आक्रमण जारी राखेको बताइएको छ।

विश्वको प्रमुख तेल मार्ग मानिने होरमुज जलडमरूमा आवतजावत प्रभावित भएको छ।

विश्व व्यापारमा प्रयोग हुने करिब पाँचौं भाग तेल यही मार्ग हुँदै जाने भएकाले यसले अन्तर्राष्ट्रिय तेल बजारमा दबाब सिर्जना गरेको छ।

अमेरिका र इरानबीचको तनाव का कारण मानवीय संकट पनि गहिरिँदै गएको छ।

लेबननमा इजरायल समर्थित आक्रमणका क्रममा हिजबुल्लाह समूहसँग सम्बन्धित क्षेत्रमा करिब ८०० जनाको मृत्यु भएको र आठ लाख ५० हजारभन्दा बढी मानिस विस्थापित भएको बताइएको छ।

इजरायल–हिजबुल्लाह द्वन्द्वमा हालसम्म लेबननमा ७७३ जनाको मृत्यु भएको छ, जसमा सयभन्दा बढी बालबालिका र १८ स्वास्थ्यकर्मी रहेका छन्।

अमेरिकाले युद्ध सुरु भएदेखि १५ हजारभन्दा बढी इरानी लक्ष्यमा आक्रमण गरेको दाबी गरिएको छ।

अमेरिकी रक्षा अधिकारीका अनुसार दैनिक एक हजारभन्दा बढी लक्ष्यमा हमला भइरहेको छ।

यसैबीच पश्चिम इराकमा अमेरिकी इन्धन आपूर्ति गर्ने एक सैन्य विमान दुर्घटनामा परेको छ, जसमा चालक दलका ६ सदस्यको मृत्यु भएको छ।

यो हालसम्म पुष्टि भएका अमेरिकी सैन्य विमान दुर्घटनामध्ये चौथो घटना हो।

यसअघि तीन अमेरिकी लडाकु विमान मित्र राष्ट्रबाट भएको गल्तीपूर्ण फायरका कारण क्षतिग्रस्त भएका थिए।

विश्लेषकहरूका अनुसार यो द्वन्द्वले विश्व अर्थतन्त्र, ऊर्जा आपूर्ति र मध्यपूर्वको सुरक्षा अवस्थामाथि गम्भीर प्रभाव पारिरहेको छ।

तेल आपूर्ति जोखिममा परेका, लाखौँ नागरिक विस्थापित भएका र व्यापक भौतिक क्षति भएको अवस्था छ।

दुबै पक्षको कडा सैन्य रणनीतिले यो संकटलाई अझ जटिल र खतरनाक बनाउँदै लगेको बताइएको छ।