एजेन्सी । इरानले एकपटक फेरि दोहोर्याएको छ– युद्धको अन्त्य अब इजरायल–अमेरिकाको हातमा नभई तेहरानको हातमा छ ।
इस्लामिक रिभोलुसनरी गार्ड कर्प्स (आईआरजीसी) का पूर्वकमान्डर तथा एक्सपेडिएन्सी डिस्नर्नमेन्ट काउन्सिलका सचिव मोहसेन रजाईले शनिबार अमेरिका र इजरायललाई यो युद्धबाट बाहिर निस्कन तेहरानको क्षतिको भरपाई गर्नुपर्ने बताएका छन् । उनले युद्ध रोक्नका लागि भविष्यमा आक्रमण नहुने ग्यारेन्टी पनि मागेका छन् ।
इरानका यी सर्त मान्न डोनाल्ड ट्रम्पका लागि सहज हुने छैन, किनकि उनले तेहरानलाई झुकाउने धम्की दिँदै आएका छन् ।
क्ल्यास रिपोर्टका अनुसार रजाईले अमेरिका र इजरायलसँगको लडाईबारे सोधिएको एक प्रश्नको जवाफमा भने, ‘युद्धको अन्त्य हाम्रो हातमा छ । हामी युद्ध अन्त्य गर्नेबारे तब मात्र विचार गर्नेछौं, जब हाम्रा दुई सर्त मानिनेछन् ।
यसमा पहिलो सर्त अमेरिकाबाट भएका सबै नोक्सानीको क्षतिपूर्ति पाउनु रहेको छ । अमेरिकाले फारसको खाडी खाली गर्नुपर्ने पनि भनिएको छ ।
रजाईले युद्ध रोक्न दोस्रो सर्त इरानमाथि आक्रमण नहुने ग्यारेन्टीलाई बनाएका छन् । भविष्यमा आफूहरूमाथि आक्रमण नहुने १०० प्रतिशत ग्यारेन्टी पाउनुपर्ने उनको माग छ । ‘यो फारसको खाडीबाट अमेरिकाको फिर्तीबिना सम्भव छैन । त्यसैले, हाम्रो युद्ध रोक्ने दोस्रो सर्त फारसी खाडीबाट अमेरिकी सेनाको फिर्ती हो,’ उनले भनेका छन् ।
रजाईको यो बयान यस्तो समयमा आएको हो, जब इरान र इजरायलबिचको युद्ध तेस्रो हप्तामा प्रवेश गरेको छ । फेब्रुअरी २८ देखि चलिरहेको यस युद्धमा दुवैतर्फ ठुलो जनधनको क्षति भएको छ । विशेषगरी इरानमा अमेरिका र इजरायलका हवाई आक्रमणबाट धेरै क्षति पुगेको छ । इरानमा १३०० भन्दा बढी मानिसले ज्यान गुमाइसकेका छन् ।
प्रकाशित मिति: ३० फाल्गुन २०८२, शनिबार
प्रतिक्रिया