एजेन्सी । इरानका नयाँ सर्वोच्च नेता आयतुल्ला मोज्तबा खामेनीले अमेरिकासँगको तनाव कम गर्ने वा युद्धविराम गर्ने प्रस्तावहरू स्पष्ट रूपमा अस्वीकार गरेका छन्।
रोयटर्सलाई एक वरिष्ठ इरानी अधिकारीले दिएको जानकारी अनुसार, दुई मध्यस्थ देशमार्फत पठाइएका वार्ताका प्रस्तावहरू खामेनीले अस्वीकार गरेका हुन्। उनका अनुसार, आफ्नो पहिलो विदेश नीति बैठकमा उनले अमेरिका र इजरायलविरुद्ध कडा र प्रतिशोधात्मक अडान लिएका थिए। यद्यपि, उनी उक्त बैठकमा प्रत्यक्ष सहभागी थिए कि थिएनन् भन्ने कुरा अझै स्पष्ट छैन।
इरान–अमेरिका–इजरायल द्वन्द्व अहिले तेस्रो हप्तामा प्रवेश गरेको छ। हालसम्म दुई पक्षीय आक्रमणमा करिब २ हजार जनाको मृत्यु भइसकेको अनुमान गरिएको छ। तर युद्ध समाप्त हुने कुनै संकेत देखिएको छैन। यसबीच, विश्वव्यापी रूपमा ऊर्जा ढुवानीको लागि महत्त्वपूर्ण स्ट्रेट अफ हर्मुज ठप्पप्रायः अवस्थामा छ, जसले तेल मूल्य वृद्धि र महँगी बढ्ने चिन्ता बढाएको छ।
इरानी सर्वोच्च नेताले शान्तिको समय नभएको भन्दै अमेरिका र इजरायललाई पराजय स्वीकार गर्न र क्षतिपूर्ति तिर्नुपर्ने सर्त अघि सारेका छन्। उता, डोनाल्ड ट्रम्पको प्रशासनले पनि पश्चिम एसियाली राष्ट्रहरूले अघि सारेका कूटनीतिक पहलहरू अस्वीकार गरेको छ।
विश्लेषकहरूले भनेका छन् कि दुबै पक्षको कठोर अडानले द्वन्द्व अझ लम्बिने संकेत दिएको छ र यसको प्रभाव केवल मध्यपूर्वमै सीमित नभई विश्व अर्थतन्त्र, ऊर्जा आपूर्ति र सुरक्षा अवस्थामाथि गम्भीर असर पार्ने देखिएको छ।
प्रकाशित मिति: ३ चैत्र २०८२, मंगलबार
प्रतिक्रिया