काठमाडौं । मध्यपूर्वमा जारी अमेरिका–इजरायल र इरानबीचको द्वन्द्व तेस्रो हप्तामा प्रवेश गरेसँगै कुवेतको प्रमुख तेल प्रशोधन केन्द्र ‘मिना अल–अहमदी’ मा शुक्रबार बिहान भीषण ड्रोन आक्रमण भएको छ।
कुवेत पेट्रोलियम कर्पोरेसनका अनुसार इरानी ड्रोनहरूको शृङ्खलाबद्ध आक्रमणका कारण रिफाइनरीका केही एकाइहरूमा आगलागी भएको छ। यो दुई दिनभित्र कुवेती तेल पूर्वाधारमा भएको दोस्रो ठूलो प्रहार हो।
आक्रमणपछि सुरक्षाको कारण रिफाइनरीका केही महत्वपूर्ण प्लान्टहरू बन्द गरिएको छ। कुवेती समाचार संस्था ‘कुना’ का अनुसार अहिलेसम्म यस घटनामा मानवीय क्षतिको विवरण सार्वजनिक भएको छैन भने अग्निनियन्त्रकहरूले आगो नियन्त्रणमा लिन प्रयास गरिरहेका छन्।
विशेषज्ञहरूका अनुसार यो आक्रमण इजरायलले इरानको ‘साउथ पार्स’ ग्यास क्षेत्रमा गरेको बमबारीको बदलास्वरूप भएको मानिएको छ।
यसै दिन इरानले बहराइन, संयुक्त अरब इमिरेट्स र साउदी अरबमा पनि मिसाइल तथा ड्रोन प्रहार गरेको छ। यस घटनापछि विश्व बजारमा कच्चा तेलको मूल्य प्रति ब्यारेल ११६ डलरभन्दा माथि पुगेको छ।
प्रकाशित मिति: ६ चैत्र २०८२, शुक्रबार
प्रतिक्रिया