काठमाडौं। अमेरिकाका विभिन्न प्रमुख शहरहरूमा राष्ट्रपति डोनाल्ड ट्रम्पको प्रशासनविरुद्ध व्यापक विरोध प्रदर्शन भइरहेका छन्। यो ‘नो किंग्स’ नामको विरोध अभियानको तेस्रो चरण हो, जसमा यसअघिका संस्करणहरूमा पनि लाखौं मानिसहरू सडकमा उत्रिएका थिए।
आयोजकहरूका अनुसार प्रदर्शनकारीहरूले ट्रम्प प्रशासनले अघि सारेका नीतिहरू — विशेष गरी इरानसँगको द्वन्द्व, कडा आप्रवासन नीति र बढ्दो महँगी — को विरोध गर्दैछन्। उनीहरूले ट्रम्पलाई “तानाशाही शैलीमा शासन गर्न खोजेको” आरोप लगाएका छन् र भन्छन्, “यो अमेरिका हो, शक्ति जनतामा निहित छ, कुनै व्यक्तिविशेष वा उनीहरूका धनी साथीहरूमा होइन।”
ह्वाइट हाउसका प्रवक्ताले भने यी प्रदर्शनहरूलाई “ट्रम्पविरोधी मानसिकता” को अभिव्यक्ति भनेका छन् र यसलाई “केही सञ्चारमाध्यम र आयोजकहरूको ध्यानाकर्षण गर्ने प्रयास” मात्र ठानेका छन्।
शनिबार देशभरका शहरहरूमा प्रदर्शन चर्किएको थियो। वासिङ्टन डीसीमा मुख्य सडकहरू र नेशनल मल क्षेत्र मानिसले खचाखच भरिएको थियो। न्युयोर्कको टाइम्स स्क्वायर, लस एन्जलस, मिनेसोटाको सेन्ट पल लगायतका ठाउँमा हजारौं मानिसहरू भेला भएका थिए।
मिनेसोटामा गत जनवरीमा आप्रवासन सम्बन्धी कारबाहीका क्रममा दुई अमेरिकी नागरिकको मृत्यु भएपछि त्यहाँको प्रदर्शन अझ भावुक बनेको थियो। त्यहाँ गायक ब्रुस स्प्रिंगस्टीनले आप्रवासन नीतिविरुद्धको एउटा गीत प्रस्तुत गरेका थिए।
केही स्थानमा प्रदर्शन हिंसात्मक पनि बनेको रिपोर्ट आएको छ। लस एन्जलसमा संघीय सुरक्षा अधिकारीहरूमाथि आक्रमण गरेको आरोपमा केही व्यक्तिलाई पक्राउ गरिएको छ। डलासमा भने विरोधी समूहबीच सामान्य झडप भएको थियो।
आयोजकहरूका दाबी अनुसार अक्टोबरमा भएको अघिल्लो ‘नो किंग्स’ प्रदर्शनमा देशभर झन्डै ७० लाख मानिस सहभागी भएका थिए। ट्रम्पले गत जनवरीमा दोस्रो पटक ह्वाइट हाउस प्रवेश गरेपछि कार्यकारी आदेशमार्फत संघीय सरकारका केही संरचना परिवर्तन गर्ने र आवश्यक परे नेशनल गार्ड परिचालन गर्ने जस्ता कदम चालेका छन्।
आलोचकहरूले यी कदमहरूलाई असंवैधानिक र लोकतन्त्रका लागि जोखिमपूर्ण भनेका छन् भने ट्रम्पले आफ्ना कार्यहरूलाई “देशलाई सही बाटोमा ल्याउने प्रयास” भनेका छन्। उनले “राजा” भन्ने आरोपलाई हास्यास्पद ठानेका छन्।
अहिले पनि न्यासभिल, ह्युस्टन, बोस्टन लगायतका शहरहरूमा विरोध प्रदर्शन जारी छ वा भर्खरै सुरु हुँदैछ।
प्रकाशित मिति: १५ चैत्र २०८२, आइतबार
प्रतिक्रिया