काठमाडौं। साउदी अरेबियाको प्रिन्स सुल्तान एयर बेसमा इरानी मिसाइल र ड्रोन आक्रमणबाट अमेरिकी वायुसेनाको कमान्ड तथा नियन्त्रण विमान ई-३ सेन्ट्री दुई टुक्रा भएको तस्बिरहरू वास्तविक भएको बीबीसी भेरिफाइले पुष्टि गरेको छ ।
सोशल मिडियामा पहिलोपटक सार्वजनिक भएका तस्बिरहरूमा उक्त विमान पूर्ण रूपमा क्षतिग्रस्त र दुई भागमा विभक्त भएको देखिन्छ । बीबीसी भेरिफाइले तस्बिरहरू रियादबाट करिब १०० किलोमिटर दक्षिण-पूर्वमा रहेको प्रिन्स सुल्तान एयर बेसका भएको पुष्टि गरेको हो ।
तस्बिरमा देखिएका खम्बा, भण्डारण क्षेत्र र पक्की मैदानका संरचनाहरू उपग्रह तस्बिरसँग मेल खाएका छन् । मार्च ११ मा खिचिएको उपग्रह तस्बिरमा पनि सोही स्थानमा ई-३ विमान देखिएको थियो । एउटा तस्बिरमा विमानको पुच्छर नम्बर समेत स्पष्ट देखिन्छ ।
यो आक्रमण मार्च २७ मा भएको थियो । अमेरिकी अधिकारीका अनुसार उक्त आक्रमणमा १२ जना अमेरिकी सैनिक घाइते भएका छन्, जसमध्ये दुई जनाको अवस्था गम्भीर छ । ई-३ सेन्ट्री विमान अमेरिकी वायुसेनाको महत्वपूर्ण एयरबोर्न वार्निङ एन्ड कन्ट्रोल सिस्टम हो जसले युद्धक्षेत्रको वास्तविक समयमा निगरानी र कमान्ड गर्दछ ।
यो घटनाले मध्य पूर्वमा जारी द्वन्द्वलाई थप तीव्र बनाएको छ । अमेरिकी सेनाले अहिलेसम्म घटनामा औपचारिक टिप्पणी गरेको छैन ।
प्रकाशित मिति: १६ चैत्र २०८२, सोमबार
प्रतिक्रिया