एजेन्सी । अमेरिकी राष्ट्रपति डोनल्ड ट्रम्प इरानविरुद्ध जारी सैन्य अभियान अन्त्य गर्ने मनस्थितिमा पुगेका छन्। द वाल स्ट्रिट जर्नलका अनुसार, रणनीतिक रूपमा अत्यन्त महत्वपूर्ण मानिने ‘स्ट्रेट अफ हर्मुज’ पूर्ण रूपमा सञ्चालनमा नआए पनि युद्ध अन्त्य गर्ने विकल्पमा अमेरिकी प्रशासनले गम्भीर छलफल अघि बढाएको छ।
समाचारमा जनाइएअनुसार, डोनल्ड ट्रम्प र उनका निकट सहयोगीहरूले हर्मुज मार्ग खुलाउन सैन्य कारबाही अझै विस्तार गर्दा द्वन्द्व प्रारम्भमा निर्धारण गरिएको ४ देखि ६ हप्ताको समयसीमाभन्दा बाहिर जान सक्ने मूल्याङ्कन गरेका छन्।
अमेरिकी पक्षले इरानको नौसैनिक तथा मिसाइल क्षमतामा उल्लेखनीय क्षति पुर्याइसकेको निष्कर्ष निकालेको छ। यही आधारमा अब निरन्तर सैन्य दबाबभन्दा कूटनीतिक उपायमार्फत इरानलाई व्यापारिक जलमार्ग पुनः सञ्चालन गर्न दबाब दिने रणनीति अवलम्बन गर्ने तयारी भइरहेको बताइएको छ।
यस विषयमा प्रतिक्रिया लिन बीबीसीले ह्वाइट हाउससँग सम्पर्क गरे पनि हालसम्म कुनै आधिकारिक प्रतिक्रिया सार्वजनिक भएको छैन।
प्रकाशित मिति: १७ चैत्र २०८२, मंगलबार
प्रतिक्रिया