काठमाडौं। अमेरिका र इजरायलले इरानमाथि आक्रमण गरेपछि पश्चिम एसियामा युद्धको चपेटा बढ्दै गएको छ र मृत्यु हुनेको संख्या निरन्तर बढिरहेको छ।
फेब्रुअरी २८ मा सुरु भएको यो द्वन्द्वमा इरानले इजरायल र खाडी क्षेत्रका अमेरिकी आधार शिविरहरूमाथि प्रतिकार आक्रमण गरिरहेको छ भने लेबनानमा पनि झडपहरू भइरहेका छन्।
अमेरिकी मानवअधिकार समूह एचआरएएनएको पछिल्लो प्रतिवेदनअनुसार इरानमा हालसम्म करिब ३,४९२ जनाको मृत्यु भएको छ। तीमध्ये १,५७४ जना सर्वसाधारण रहेका छन् र कम्तीमा २३६ जना बालबालिका रहेका छन्।
इजरायलमा मिसाइल आक्रमणबाट १९ जनाको मृत्यु भएको इजरायली एम्बुलेन्स सेवा (मेगन डेविड एडोम) ले जनाएको छ। इजरायली रक्षा बलका अनुसार दक्षिण लेबनानमा भएका झडपमा ९ जना इजरायली सैनिक मारिएका छन्।
लेबनानको स्वास्थ्य मन्त्रालयका अनुसार इजरायली आक्रमणमा १,२४७ जनाको मृत्यु भएको छ, जसमध्ये १२४ जना बालबालिका रहेका छन्।
खाडीका अन्य देशहरूमा पनि युद्धको प्रभाव परेको छ। त्यहाँ कम्तीमा २४ जनाको मृत्यु भएको छ, जसमध्ये धेरैजसो सुरक्षा निकायका सदस्य वा विदेशी कामदार रहेका छन्। संयुक्त अरब इमिरेट्समा ११ जना, कुवेतमा ७ जना र ओमान, साउदी अरब तथा बहराइनमा दुई-दुई जनाको ज्यान गएको छ।
युद्धले क्षेत्रीय रूपमा ठूलो मानवीय क्षति पुर्याइरहेको छ र मृत्यु हुनेको संख्या दिनप्रतिदिन बढ्दै गएको विभिन्न अन्तर्राष्ट्रिय स्रोतहरूले जनाएका छन्।
प्रकाशित मिति: १७ चैत्र २०८२, मंगलबार
प्रतिक्रिया