एजेन्सी । अमेरिकी राष्ट्रपति डोनाल्ड ट्रम्पले इरानमा सञ्चालन भइरहेको सैन्य अभियान छिट्टै टुंगिने र आगामी दुईदेखि तीन साताभित्र अमेरिकी सेना फिर्ता हुने घोषणा गरेका छन्। ह्वाइट हाउसस्थित ओभल अफिसमा सञ्चारकर्मीहरूसँग कुरा गर्दै उनले इरानविरुद्ध गरिएका हवाई आक्रमण तथा सैन्य कारबाहीले निर्धारित उद्देश्य पूरा गरिसकेको दाबी गरे।
गत महिना इजरायलसँगको सहकार्यमा सुरु गरिएको उक्त अभियानको प्रमुख लक्ष्य इरानको आणविक हतियार विकास गर्ने क्षमतालाई निष्क्रिय बनाउनु रहेको र सो लक्ष्य हासिल भइसकेको उनले बताए। उनका अनुसार अमेरिकी सेनाले अहिले अन्तिम चरणका कामहरू सम्पन्न गरिरहेको छ।
राष्ट्रपति डोनाल्ड ट्रम्पले इरानको आकाशमा पूर्ण रूपमा अमेरिकी नियन्त्रण स्थापित भएको र त्यहाँका सैन्य संरचना तथा पूर्वाधारहरू ध्वस्त भइसकेको दाबी गरे। साथै, इरानका उच्च राजनीतिक तथा सैन्य नेतृत्वको पतनसँगै नयाँ नेतृत्व उदाएको र त्यो अघिल्लो शासनको तुलनामा कम कट्टर र बढी व्यवहारिक रहेको उनको भनाइ थियो। इरानको नौसेना तथा समग्र सैन्य संरचना कमजोर भइसकेकाले हाल कुनै प्रभावकारी प्रतिरोध नरहेको उनले उल्लेख गरे।
इरानले वार्ताका लागि पहल गरिरहेको दाबी गर्दै ट्रम्पले औपचारिक सम्झौता भए पनि नभए पनि अमेरिका निर्धारित समयमै इरानबाट बाहिरिने स्पष्ट पारे। उनले इरानले पुनः कहिल्यै आणविक हतियार विकास गर्न नसक्ने सुनिश्चित भएपछि मात्र पूर्ण रूपमा फिर्ता हुने बताए।
इरानबाट अमेरिकी प्रविधि कम्पनीहरूलाई दिइएका धम्कीप्रति प्रतिक्रिया दिँदै उनले व्यङ्ग्यात्मक शैलीमा इरानसँग अब उल्लेखनीय सैन्य क्षमता बाँकी नरहेको टिप्पणी गरे।
युद्धका कारण बढेको इन्धन मूल्यबारे बोल्दै ट्रम्पले सैन्य अभियान समाप्त भएसँगै तेलको मूल्यमा गिरावट आउने विश्वास व्यक्त गरे। उनले अमेरिका यस युद्धमा पूर्ण रूपमा सफल भएको र अब इरानमा रहिरहनुपर्ने कुनै कारण नरहेको दोहोर्याए।
यद्यपि, इरानले भने अमेरिकी दाबीहरूलाई निरन्तर अस्वीकार गर्दै आएको छ र ट्रम्पका भनाइप्रति आधिकारिक रूपमा सहमति जनाएको छैन।
प्रकाशित मिति: १८ चैत्र २०८२, बुधबार
प्रतिक्रिया