जनकपुर। धनुषा जिल्लाको ढल्केबरमा सञ्चालित एक औषधि पसलबाट ठूलो मात्रामा लागूऔषध बरामद गर्दै प्रहरीले फार्मेसी सञ्चालक लाई पक्राउ गरेको छ ।
धनुषा प्रहरीका अनुसार ढल्केबरस्थित निको फार्मेसी का सञ्चालक ५० वर्षीय रामकुमार महतो पक्राउ परेका छन् । उनी मिथिला नगरपालिका–७, ढल्केबरका स्थानीय बासिन्दा हुन् ।
प्रहरीले उक्त फार्मेसीबाट टापेन्टा ट्याब्लेट ४६० पत्ता, स्पासरेस्ट ९५ पत्ता र डोवेल ६० पत्ता लगायतका लागूऔषधजन्य औषधिहरू बरामद गरेको छ । यससँगै नगद १ लाख ३५ हजार रुपैयाँ पनि प्रहरीले जफत गरेको छ ।
यो घटनाको सुरुवात मिथिला नगरपालिका–१० रातोपुलबाट बर्दिवासतर्फ पैदल जाँदै गरेका तीन जना युवालाई शंकास्पद देखेर जाँच गर्दा भएको थियो । उनीहरूको साथबाट टापेन्टा लागूऔषध फेला परेपछि प्रहरीले उनीहरूलाई पक्राउ गरेको थियो ।
पक्राउ पर्ने युवाहरूमा सिन्धुलीको दुधौली नगरपालिका–५ सिर्थौलीका २० वर्षीय साजन परियार, २१ वर्षीय दोर्जे लामा र २० वर्षीय दीपेश साह रहेका छन् ।
ती युवाहरूसँग बरामद भएको लागूऔषधको स्रोत खोज्दै जाँदा प्रहरीको अनुसन्धानले ढल्केबरको निको फार्मेसीसँग जोडिएको खुलेको थियो । त्यसपछि प्रहरी टोलीले फार्मेसीमा छापा मारेर ठूलो परिमाणमा लागूऔषध बरामद गर्दै सञ्चालक रामकुमार महतोलाई पक्राउ गरेको हो ।
इलाका प्रहरी कार्यालय ढल्केबरले जारी गरेको प्रेस विज्ञप्तिमा घटनाबारे थप अनुसन्धान भइरहेको जनाएको छ । प्रहरीले लागूऔषध कारोबारमा संलग्न अन्य व्यक्तिहरूको पनि खोजी गरिरहेको बताएको छ ।
यो घटनाले स्थानीय स्तरमा फार्मेसीहरूबाटै लागूऔषधको अवैध कारोबार भइरहेको तथ्य उजागर गरेको छ । धनुषा प्रहरीले यस्ता गतिविधिप्रति कडा निगरानी बढाउने र आवश्यक कारबाही गर्ने प्रतिबद्धता जनाएको छ ।
प्रकाशित मिति: १८ चैत्र २०८२, बुधबार
प्रतिक्रिया