इस्लामाबाद। पाकिस्तानको खैबर पख्तुनख्वा प्रान्तको बन्नु जिल्लामा शुक्रबार भएको आत्मघाती बम विस्फोटमा ५ जनाको मृत्यु भएको छ ।
५ जनाको मृत्यु हुनेमा तीन महिला र दुई बालबालिका रहेका छन् ।
प्रहरी चौकीलाई लक्षित गरी विस्फोटक पदार्थले भरिएको गाडीमा गरिएको सो आक्रमणमा अन्य चार जना घाइते भएका छन् ।
स्थानीय प्रहरी अधिकारी मुहम्मद सज्जाद खानका अनुसार अहिलेसम्म कुनै पनि समूहले आक्रमणको जिम्मेवारी लिएको छैन ।
यो क्षेत्रमा सन् २०२१ मा अफगानिस्तानमा तालिबान सत्तामा फर्किएपछि आतंककारी आक्रमणहरू बढेका छन् । तेहरीक–ए–तालिबान पाकिस्तान (टीटीपी) ले नियमित रूपमा सुरक्षा फौजलाई लक्षित गर्दै आएको छ ।
इस्लामाबादले छिमेकी अफगानिस्तानलाई आफ्नो भूमिमा शरण लिइरहेका आतंककारीहरूलाई नियन्त्रण नगरेको आरोप लगाउँदै आएको छ ।
यो पछिल्लो विस्फोटले पाकिस्तानको उत्तरपश्चिमी क्षेत्रमा सुरक्षा चुनौती अझै कायम रहेको देखाएको छ ।
प्रकाशित मिति: २० चैत्र २०८२, शुक्रबार
प्रतिक्रिया