मकवानपुर। नेपाल प्रहरीले शान्ति सुरक्षालाई मजबुत बनाउने उद्देश्यले सञ्चालन गरेको विशेष अभियान ‘अपरेशन ड्रप’ अन्तर्गत मकवानपुरमा १८ जनालाई नियन्त्रणमा लिएको छ ।
जिल्ला प्रहरी कार्यालय मकवानपुरले गुण्डागर्दी, अवाञ्छित गतिविधि र सर्वसाधारणलाई त्रसित पार्ने कार्यमा संलग्न रहेको आशंकामा उनीहरूलाई पक्राउ गरेको हो ।
प्रहरीका अनुसार हेटौंडा उपमहानगरपालिकाका विभिन्न वडामा लक्षित रूपमा सञ्चालन गरिएको अपरेशनका क्रममा ती व्यक्तिहरू पक्राउ परेका हुन् ।
पक्राउ पर्नेहरूमा स्थानीय युवा र मध्यम उमेरका व्यक्तिहरू रहेका छन् ।
प्रारम्भिक अनुसन्धान अनुसार उनीहरू केही समययता सार्वजनिक स्थलमा झैझगडा गर्ने, धम्की दिने, लागूऔषध कारोबार तथा सेवनमा संलग्न रहेको खुलेको छ ।
जिल्ला प्रहरी कार्यालय मकवानपुरका प्रहरी नायब उपरीक्षक (डीएसपी) पुष्कर बोगटीले अभियान अन्तर्गत सूचनाको आधारमा निरन्तर निगरानी, छापा तथा समुदायसँगको सहकार्यमा अपरेशन अघि बढाइएको बताए ।
“समुदायमा त्रास फैलाउने तथा शान्ति सुरक्षामा खलल पुर्याउने जोसुकैलाई कानुनी दायरामा ल्याइने छ,” डीएसपी बोगटीले भने, “यस्ता गतिविधि नियन्त्रण गर्न प्रहरी अझ सक्रिय रूपमा परिचालन हुनेछ ।”
नियन्त्रणमा लिइएका व्यक्तिहरूमाथि आवश्यक अनुसन्धान अघि बढाइएको छ ।
केहीमाथि सार्वजनिक अपराध र लागूऔषध सम्बन्धी मुद्दा दर्ता गर्ने तयारी भइरहेको छ भने बाँकीको सोधपुछपछि थप कारबाही प्रक्रिया अघि बढाइनेछ ।
अभियानका क्रममा प्रहरीले हेटौंडाका विभिन्न क्षेत्रमा नियमित गस्ती तीव्र पारेको छ ।
विशेष गरी रातिको समयमा हुने आपराधिक गतिविधि नियन्त्रण गर्न मोटरसाइकल गस्ती, सादा पोशाकका प्रहरी परिचालन र सीसीटीभी निगरानीलाई प्रभावकारी बनाइएको छ ।
प्रहरीले स्थानीय बासिन्दासँग समन्वय गर्दै शंकास्पद गतिविधिबारे तुरुन्त जानकारी गराउन आग्रह गरेको छ ।
“समुदायको सहयोगबिना शान्ति सुरक्षा कायम गर्न कठिन हुन्छ,” डीएसपी बोगटीले थपे, “नागरिकसँगको सहकार्यबाट सुरक्षित वातावरण निर्माण गर्न हामी प्रतिबद्ध छौं ।”
जिल्ला प्रहरी कार्यालयले ‘अपरेशन ड्रप’ लाई निरन्तरता दिँदै आगामी दिनमा अझ प्रभावकारी बनाउने योजना रहेको जनाएको छ ।
प्रहरीको यो सक्रियताले स्थानीय बासिन्दामा सुरक्षाको अनुभूति बढेको प्रतिक्रिया आएको छ ।
यो अभियानले गुण्डागर्दी र अवाञ्छित गतिविधिलाई नियन्त्रण गर्ने प्रहरीको दृढ प्रयासलाई झल्काएको छ ।
प्रकाशित मिति: २३ चैत्र २०८२, सोमबार
प्रतिक्रिया