काठमाडौं । नेपाल उद्योग वाणिज्य महासंघको ६०औँ वार्षिक साधारण सभा तथा अधिवेशन नजिकिँदै गर्दा एशोसिएट (खुल्ला) तर्फ केन्द्रीय कार्यकारिणी समिति सदस्य पदमा व्यवसायी बलराम सापकोटाको उम्मेदवारीले विशेष चर्चा पाएको छ।
पूर्वी नेपालको सफल आतिथ्य व्यवसायलाई राष्ट्रिय पहिचान दिलाएका सापकोटा अहिले महासंघमार्फत समग्र निजी क्षेत्रको नेतृत्वमा थप प्रभावशाली भूमिका निर्वाह गर्ने तयारीमा देखिएका छन्।
ज्योत्स्ना श्रेष्ठ उपाध्यक्ष उम्मेदवार रहेको समूहबाट प्रतिस्पर्धामा उत्रिएका सापकोटा झापाको मेचीनगर–धुलाबारीस्थित चर्चित लक्जरी होटल ‘मेची क्राउन’का संस्थापक सञ्चालकमध्ये एक हुन्।
पूर्वी नेपालमै विश्वस्तरीय होटल स्थापनाको सपना देखेर अघि बढेका उनले छोटो समयमै उक्त परियोजनालाई सफल बनाउँदै क्षेत्रीय अर्थतन्त्र र पर्यटन प्रवर्द्धनमा उल्लेखनीय योगदान दिएका छन्।
२०५ भन्दा बढी कोठा, अत्याधुनिक कन्फरेन्स सुविधा, स्विमिङ पुल, क्यासिनो, हेलिप्याड लगायतका संरचनासहितको मेची क्राउन आज पूर्वी नेपालको मात्र नभई राष्ट्रिय स्तरकै उत्कृष्ट होटलहरूको सूचीमा अग्रस्थानमा उभिएको छ। सीमावर्ती व्यापारिक केन्द्रसँगको रणनीतिक अवस्थिति र अन्तर्राष्ट्रिय स्तरको सेवा सुविधाले होटललाई पर्यटक र व्यवसायिक कार्यक्रमहरूको प्रमुख गन्तव्य बनाएको छ।
यही सफल अनुभवलाई आधार बनाउँदै सापकोटा अहिले राष्ट्रिय व्यावसायिक नेतृत्वमा सक्रिय हुँदैछन्। उम्मेदवारी घोषणा गर्दै उनले निजी क्षेत्रले भोगिरहेका चुनौतीहरूको समाधानका लागि महासंघलाई अझ प्रभावकारी बनाउने आवश्यकता औंल्याएका छन्।
“निजी क्षेत्र अहिले अनेक दबाब र अन्योलमा छ। यस्तो अवस्थामा महासंघ व्यवसायीहरूको सशक्त र स्पष्ट आवाज बन्नुपर्छ,” उनले भने, “म महासंघमा पुगेर नीतिगत स्थायित्व, लगानी सुरक्षा र सहज व्यवसाय वातावरणका लागि दृढतापूर्वक काम गर्नेछु।”
उनका अनुसार साना तथा मझौला उद्यमीहरूको संरक्षण, उत्पादनमूलक क्षेत्रको प्रवर्द्धन, तथा पर्यटन र सेवा क्षेत्रको पुनःउत्थान प्राथमिकतामा पर्नेछन्। साथै, प्रदेशस्तरका व्यवसायीका मुद्दा केन्द्रीय तहसम्म प्रभावकारी रूपमा पुर्याउने आफ्नो मुख्य लक्ष्य रहेको उनले बताएका छन्।
पूर्वी नेपालबाट सुरु भएको व्यवसायिक यात्रा राष्ट्रिय नेतृत्वतर्फ विस्तार गर्दै गरेका सापकोटाको सक्रियताले निजी क्षेत्रभित्र नयाँ आशा र ऊर्जा थपिएको देखिन्छ। मेची क्राउनमार्फत स्थापित सफलताको कथा बोकेका उनी अब महासंघमा पुगेर समग्र व्यवसायिक वातावरण सुधारका लागि ठोस भूमिका खेल्ने अपेक्षा गरिएको छ।
अनुभव, दृष्टिकोण र परिणाममुखी कार्यशैलीको संयोजनका कारण बलराम सापकोटा एशोसिएट (खुल्ला) सदस्य पदका लागि एक सशक्त, विश्वसनीय र आशालाग्दा उम्मेदवारका रूपमा उदाएका छन्।
प्रकाशित मिति: २३ चैत्र २०८२, सोमबार
प्रतिक्रिया