पाेखरा। कास्कीको पोखरा महानगरपालिका–सभागृह चोकमा ४२ वर्षीया सिर्जना पौडेल केसीको हत्या प्रकरणमा संलग्न आरोपी शिशिर केसी लाई प्रहरीले बुटवलबाट पक्राउ गरी पोखरा ल्याएको छ।
जिल्ला प्रहरी कार्यालय कास्कीका अनुसार खुँडा प्रहार गरी हत्या गरेको आरोपमा फरार रहेका केसीलाई रुपन्देहीको बुटवल क्षेत्रबाट नियन्त्रणमा लिइएको हो। पक्राउ परेका उनलाई थप अनुसन्धानका लागि कास्की ल्याइएको प्रहरीले जनाएको छ।
प्रारम्भिक अनुसन्धानअनुसार आरोपी शिशिर केसी मृतकका सहोदर भान्जा रहेको खुलेको छ। घटनाको कारणबारे विस्तृत अनुसन्धान भइरहेको प्रहरीले जनाएको छ।
उक्त घटना केही दिनअघि पोखराको व्यस्त क्षेत्र सभागृह चोकमा भएको थियो, जसले स्थानीयवासीलाई त्रसित बनाएको थियो। घटनापछि फरार रहेका आरोपीको खोजी तीव्र बनाइएको थियो।
प्रहरीले घटनासम्बन्धी थप विवरण अनुसन्धानपछि सार्वजनिक गरिने जनाएको छ।
प्रकाशित मिति: २७ चैत्र २०८२, शुक्रबार
प्रतिक्रिया