काठमाडौं । अमेरिकी राष्ट्रपति डोनाल्ड ट्रम्पले इरानसँगको युद्ध अन्त्यका लागि गरिएका कूटनीतिक प्रयास असफल भएपछि इरानमाथि नौसैनिक नाकाबन्दी लगाउने चेतावनी दिएका छन्। उपराष्ट्रपति जेडी भान्सको नेतृत्वमा पाकिस्तानको इस्लामाबादमा करिब २१ घण्टा चलेको वार्ता बिना सहमति टुंगिएको थियो।
ट्रम्पले सामाजिक सञ्जालमार्फत इरानतर्फ जाने जहाजहरू रोक्ने, होर्मुज जलडमरुमा रहेका बारुदी सुरुङ हटाउने र आवश्यक परे पुनः सैन्य कारबाही गर्न अमेरिका तयार रहेको बताएका छन्। साथै, इरानले आफ्नो परमाणु कार्यक्रम त्याग्न अस्वीकार गरेको उनले दाबी गरेका छन्।
यस सम्भावित कदमले नयाँ जोखिमहरू पनि निम्त्याएको छ। अमेरिकी युद्धपोतहरू इरानी आक्रमणको निशानामा पर्न सक्ने, विदेशी जहाजमाथि बल प्रयोगको प्रश्न उठ्न सक्ने तथा इरानी तेलमा निर्भर देशहरूको प्रतिक्रिया अनिश्चित रहने देखिएको छ। यसले विश्व बजारमा तेलको मूल्य थप बढ्न सक्ने चिन्तासमेत बढाएको छ।
यसबीच, अमेरिकी संसदका केही सदस्यहरूले नाकाबन्दीको प्रभावकारितामाथि प्रश्न उठाएका छन्। सर्वेक्षणअनुसार अधिकांश अमेरिकी नागरिकले युद्ध अवस्थालाई नकारात्मक रूपमा हेरिरहेका छन्।
द्वन्द्व दोस्रो महिनामा प्रवेश गर्दा र अस्थायी युद्धविराम कमजोर बन्दै जाँदा अवस्था अझ जटिल बनेको छ। अहिले यो संघर्ष इरानको सहनशीलता र ट्रम्प प्रशासनको राजनीतिक तथा आर्थिक दबाब झेल्ने क्षमताबीचको परीक्षा बनेको विश्लेषण गरिएको छ। विज्ञहरूका अनुसार यो द्वन्द्व लम्बिँदै जाँदा सबै पक्षलाई क्षति पुग्ने सम्भावना उच्च छ। बीबीसीको सहयोगमा
प्रकाशित मिति: ३० चैत्र २०८२, सोमबार
प्रतिक्रिया