काठमाडौं । जेनजी मुभमेन्ट नेपालले गृहमन्त्री सुधन गुरुङमाथि लागेका गम्भीर आरोपहरूको निष्पक्ष छानबिन सुनिश्चित गर्न उनलाई तत्काल पदबाट हटाउन सरकारसँग माग गरेको छ।
मुभमेन्टका प्रवक्ता विजय शाहले सोमबार जारी गरेको प्रेस विज्ञप्तिमा मन्त्री पदमा बहाल रहँदा अनुसन्धान प्रक्रिया प्रभावित हुन सक्ने र यसले स्वार्थको द्वन्द्व निम्त्याउने उल्लेख गरिएको छ।
त्यसैगरी, जेनजी मुभमेन्टले मन्त्री नियुक्ति र बर्खास्तीलाई हल्का तथा अमर्यादित खेल नबनाउन बालेन शाह नेतृत्वको सरकारसँग आग्रह गरेको छ। क्याबिनेटमा कसलाई समावेश गर्ने भन्ने निर्णय गम्भीर राजनीतिक तथा नैतिक विषय भएकाले नेतृत्वले परिपक्वता, दूरदर्शिता र जवाफदेहिता प्रदर्शन गर्नुपर्ने बताइएको छ।
‘यो साधारण सरकार होइन, ७६ जना शहीदहरूको रक्तबलिदानबाट प्राप्त जनादेशको प्रतिनिधित्व हो,’ विज्ञप्तिमा भनिएको छ, ‘जनताको त्याग र बलिदानमाथि सस्तो राजनीति गर्ने अधिकार कसैलाई छैन।’
मुभमेन्टले सुशासन, पारदर्शिता र जवाफदेहितामा कुनै पनि किसिमको सम्झौता वा ढिलासुस्ती स्वीकार्य नहुने चेतावनी दिएको छ।
विवादास्पद व्यापारी दीपक भट्टसँग गुरुङको साझेदारी रहेको विषय सार्वजनिक भएपछि उनी विवादमा परेका हुन्।
प्रकाशित मिति: ७ बैशाख २०८३, सोमबार
प्रतिक्रिया