काठमाडौं। चालु आर्थिक वर्ष २०८२/८३ को पहिलो नौ महिना (साउनदेखि चैतसम्म) मा नेपालको निर्यात व्यापार ले २ खर्ब रुपैयाँको सीमा पार गरेको छ ।
तर आयातमा भएको ठूलो वृद्धिका कारण व्यापार घाटा भने अझ फराकिलो बन्दै १२ खर्ब ६७ अर्ब रुपैयाँ नाघेको छ ।
भन्सार विभागका अनुसार समीक्षा अवधिमा कुल निर्यात १८ दशमलव ४६ प्रतिशतले बढेर २ खर्ब रुपैयाँमाथि पुगेको हो ।
गत आर्थिक वर्षको सोही अवधिमा निर्यात १ खर्ब ८८ अर्ब १९ करोड रुपैयाँ रहेको थियो ।
यसैगरी आयात पनि १३ दशमलव ८२ प्रतिशतले बढेर १४ खर्ब ९० अर्ब रुपैयाँभन्दा माथि पुगेको छ ।
गत वर्षको चैतसम्म आयात १३ खर्ब ९ अर्ब रुपैयाँ बराबर थियो ।
निर्यातमा उल्लेख्य सुधार भए पनि आयातको उच्च वृद्धिका कारण व्यापार घाटा १३ दशमलव ०४ प्रतिशतले बढेर १२ खर्ब ६७ अर्ब रुपैयाँ पुगेको विभागले जनाएको छ ।
गत आर्थिक वर्षको सोही अवधिमा यस्तो घाटा ११ खर्ब २१ अर्ब रुपैयाँ रहेको थियो ।
अर्थविद्हरूले निर्यात बढ्नुलाई सकारात्मक संकेत भने पनि नेपालको अर्थतन्त्र अझै आयातमा अत्यधिक निर्भर रहेको बताएका छन् ।
उनीहरूका अनुसार दीर्घकालीन रूपमा व्यापार घाटा घटाउन स्वदेशी उत्पादन वृद्धि, निर्यात विविधीकरण र आयात प्रतिस्थापन नीतिमा जोड दिनुपर्ने आवश्यकता रहेको छ ।
यो अवधिमा निर्यात बढ्नु भनेको नेपाली वस्तुको विदेशी बजारमा माग बढेको संकेत हो ।
तर आयातको तीव्र वृद्धिले व्यापार सन्तुलन कायम गर्न चुनौती थपिएको देखिन्छ ।
सरकार र नीति निर्माताहरूले अब निर्यात प्रवर्धनका लागि ठोस कदम चाल्नुपर्ने र आयात घटाउने प्रभावकारी रणनीति बनाउनुपर्नेमा जोड दिइएको छ ।
प्रकाशित मिति: ८ बैशाख २०८३, मंगलबार
प्रतिक्रिया