पोखरा। कास्की प्रहरीले शान्ति सुरक्षा कायम गर्न बुधबार राति व्यापक ‘स्वीप अपरेसन’ सञ्चालन गरेको छ ।
उक्त अपरेसनका क्रममा एकै रात १ सय २२ भन्दा बढी व्यक्तिलाई नियन्त्रणमा लिइएको प्रहरीले जनाएको छ ।
प्रहरीका अनुसार विभिन्न युनिटसँग समन्वय गरी पोखराका विभिन्न स्थानमा एकैसाथ अपरेसन चलाइएको हो ।
पक्राउ पर्नेहरूमा सबैभन्दा धेरै बैदाम क्षेत्रबाट ३९ जना रहेका छन् । त्यस्तै, रामबजारबाट २२ जना, बगरबाट १२ जना, सिसुवा क्षेत्रबाट ३८ जना र पृथ्वीचोक आसपासबाट ११ जना नियन्त्रणमा लिइएका छन् ।
पक्राउ परेकामध्ये अधिकांश लागुऔषध सेवनमा संलग्न रहेको पाइएको छ ।
विशेषगरी ८२ जना गाँजा सेवन गरिरहेको अवस्थामा फेला परेका थिए ।
यसबाहेक सार्वजनिक स्थलमा होहल्ला गर्ने, सर्वसाधारणलाई असहज हुने गतिविधि गर्ने, शान्ति भंग गर्ने तथा जथाभाबी सवारी चलाएर ध्वनि प्रदूषण गर्ने व्यक्तिहरूलाई समेत नियन्त्रणमा लिइएको प्रहरीले जनाएको छ ।
प्रहरीले नियन्त्रणमा लिइएकाहरूलाई आवश्यक सम्झाइबुझाइ गरेर अभिभावकको जिम्मा लगाउने तयारी गरिएको जनाएको छ ।
गतिविधिको प्रकृति हेरेर पहिलो पटकका लागि सचेत गराउँदै आगामी दिनमा यस्ता कार्य नगर्ने प्रतिबद्धता लिने गरी छाडिने प्रहरीको भनाइ छ ।
प्रकाशित मिति: १० बैशाख २०८३, बिहिबार
प्रतिक्रिया