काठमाडौं । गत चैत महिनामा देशका विभिन्न भागमा विपद्जन्य घटनाहरू बढ्दै जाँदा करिब नौ सय वटा घटना दर्ता भएका छन्। यी घटनामा परी ३० जनाले ज्यान गुमाएका छन् भने ठूलो मात्रामा मानवीय तथा भौतिक क्षति भएको छ।
प्राप्त विवरणअनुसार आगलागी, हुरी, चट्याङ, हिमपात लगायतका प्राकृतिक तथा दैवी विपत्तिका कारण कुल ३० जनाको मृत्यु भएको हो। मृतकमध्ये १६ जना पुरुष, १० जना महिला र ४ जना बालबालिका रहेका छन्।
विपद्का घटनामा परी २२२ जना घाइते भएका छन्। घाइतेमध्ये कतिपयको अवस्था सामान्य रहे पनि केहीको उपचार जारी रहेको जनाइएको छ।
भौतिक क्षतिको विवरण हेर्दा १९१ वटा घर, ११७ वटा गोठ तथा ३ वटा सरकारी कार्यालयमा क्षति पुगेको छ। यस्तै, विपद्का कारण ५२९ वटा पशुचौपाया मरेका छन्, जसले ग्रामीण अर्थतन्त्रमा थप असर पारेको छ।
प्रारम्भिक अनुमानअनुसार विपद्बाट कुल करिब ३३ करोड ७२ लाख ६१ हजार रुपैयाँ बराबरको क्षति भएको छ। यो क्षतिले व्यक्तिगत, सार्वजनिक तथा सरकारी संरचनामा उल्लेखनीय प्रभाव पारेको देखिन्छ।
विपद् व्यवस्थापन तथा प्रतिकार्यका लागि सुरक्षा निकाय सक्रिय रूपमा परिचालित भएका थिए। प्रहरी प्रवक्ता अविनारायण काफ्लेले जनाएअनुसार सो अवधिमा मात्रै ४ हजार ८४१ जना प्रहरी परिचालन गरी उद्धार तथा राहत कार्य सञ्चालन गरिएको थियो।
त्यस्तै, विपद्का कारण १४३ जना व्यक्ति विस्थापित भएका छन्। उनीहरूलाई अस्थायी रूपमा सुरक्षित स्थानमा राखिएको र आवश्यक राहत उपलब्ध गराइएको जनाइएको छ।
प्रदेशगत रूपमा हेर्दा सो महिनामा कोशी प्रदेशमा २७२ वटा, मधेस प्रदेशमा १३६ वटा, बागमती प्रदेशमा ८५ वटा, काठमाडौं उपत्यकामा ३९ वटा, गण्डकी प्रदेशमा ९५ वटा, लुम्बिनी प्रदेशमा १२९ वटा, कर्णाली प्रदेशमा ५७ वटा तथा सुदूरपश्चिम प्रदेशमा ९३ वटा विपद्का घटना दर्ता भएका छन्।
समग्रमा चैत महिनामा देखिएको विपद् घटनाले देशभर मानवीय क्षति मात्र होइन, भौतिक संरचना र पशुधनमा समेत उल्लेखनीय असर पारेको देखिएको छ।
प्रकाशित मिति: १० बैशाख २०८३, बिहिबार
प्रतिक्रिया