हेटौँडा । लामो समयदेखि आर्थिक संकट र व्यवस्थापनसम्बन्धी समस्यामा परेको सरकारी स्वामित्वको हेटौँडा सिमेन्ट उद्योग फेरि बन्द भएको छ। कच्चा पदार्थको अभावलाई मुख्य कारण देखाउँदै उद्योगले उत्पादन पूर्ण रूपमा रोकिएको जनाएको छ।
करिब एक महिनाअघि मात्र पुनः सञ्चालनमा ल्याइएको उद्योग कोइला तथा ढुङ्गाजस्ता अत्यावश्यक कच्चा पदार्थको आपूर्ति सुनिश्चित गर्न नसक्दा पुनः बन्द अवस्थामा पुगेको हो।
उद्योग व्यवस्थापनका अनुसार हाल कोइला आपूर्तिमा गम्भीर समस्या देखिएको छ भने आवश्यक रकमको अभावका कारण उत्पादन प्रक्रिया अघि बढाउन सकिने अवस्था छैन।
कोइला खरिदका लागि बोलपत्र आह्वान गरिए पनि आर्थिक स्रोतको व्यवस्था गर्न नसकिएको र आपूर्तिकर्तालाई भुक्तानी दिन बाँकी रहेको कारण आपूर्ति प्रक्रिया नै अवरुद्ध भएको उद्योगले जनाएको छ।
यसअघि नै विभिन्न आपूर्तिकर्ता तथा कर्मचारीहरूलाई अर्बौँ रुपैयाँ भुक्तानी गर्न बाँकी रहेको हुँदा उद्योगको आर्थिक दायित्व झनै बढ्दै गएको बताइएको छ।
केही समयअघि पुनः सञ्चालनमा आएपछि उद्योगले केही हजार टन कच्चा पदार्थ उत्पादन गरी सिमेन्ट प्याकेजिङको काम सुरु गरेको थियो। तर, नियमित आपूर्ति नहुनु र मेसिनरी मर्मतसम्भारमा समस्या देखिनुका कारण उत्पादन निरन्तरता दिन नसकिएको हो।
सरकारले पटक–पटक रुग्ण उद्योग सञ्चालन गर्ने घोषणा गर्दै आए पनि हेटौँडा सिमेन्ट उद्योग भने पटक–पटक खुल्ने र बन्द हुने अवस्थाबाट गुज्रिरहेको छ।
लामो इतिहास बोकेको यो उद्योगको वर्तमान अवस्थाले सरकारी उद्योगहरूको व्यवस्थापन, आर्थिक अनुशासन र दीर्घकालीन सञ्चालन क्षमतामाथि गम्भीर प्रश्न उठाएको छ।
प्रकाशित मिति: ११ बैशाख २०८३, शुक्रबार
प्रतिक्रिया