काठमाडौं। नेपाल उद्योग वाणिज्य महासंघको ६०औँ वार्षिक साधारण सभा तथा अधिवेशन नजिकिँदै जाँदा निजी क्षेत्रभित्र चुनावी चहलपहल तीव्र बन्दै गएको छ।
यसैक्रममा एशोसिएट (खुल्ला) तर्फ केन्द्रीय कार्यकारिणी समिति सदस्य पदका लागि व्यवसायी बलराम सापकोटाको उम्मेदवारी विशेष रूपमा चर्चामा आएको छ।
पूर्वी नेपालमा आतिथ्य व्यवसायमार्फत उल्लेखनीय सफलता हासिल गरेका सापकोटा अहिले महासंघको नेतृत्व तहमा पुगेर समग्र निजी क्षेत्रको हितमा प्रभावकारी भूमिका खेल्ने लक्ष्यसहित चुनावी मैदानमा उत्रिएका छन्।
उपाध्यक्ष पदकी उम्मेदवार ज्योत्स्ना श्रेष्ठ नेतृत्वको समूहबाट प्रतिस्पर्धा गरिरहेका सापकोटा झापाको मेचीनगर–धुलाबारीस्थित चर्चित लक्जरी होटल ‘मेची क्राउन’का संस्थापक सञ्चालकमध्ये एक हुन्।
विश्वस्तरीय सेवा र पूर्वाधारसहित पूर्वी नेपालमै अन्तर्राष्ट्रिय स्तरको होटल स्थापना गर्ने दीर्घकालीन सोचका साथ अघि बढेका उनले छोटो समयमै उक्त परियोजनालाई सफलतामा रूपान्तरण गरेका छन्।
२०५ भन्दा बढी कोठा, अत्याधुनिक कन्फरेन्स हल, स्विमिङ पुल, क्यासिनो, हेलिप्याड लगायतका सुविधासहित सञ्चालनमा रहेको मेची क्राउन होटल आज पूर्वी नेपालको मात्र नभई राष्ट्रिय स्तरमै उत्कृष्ट होटलहरूको सूचीमा अग्रस्थानमा उभिएको छ।
सीमावर्ती व्यापारिक केन्द्रसँगको रणनीतिक अवस्थिति र अन्तर्राष्ट्रिय स्तरको सेवा सुविधाका कारण यो होटल आन्तरिक तथा बाह्य पर्यटकका साथै ठूला व्यावसायिक कार्यक्रमहरूको प्रमुख गन्तव्य बन्न सफल भएको छ।
यही सफल व्यवस्थापकीय अनुभवलाई आधार बनाएर सापकोटा अहिले महासंघमार्फत व्यापक व्यावसायिक नेतृत्वमा सक्रिय हुन खोजिरहेका छन्।
उम्मेदवारी घोषणा गर्दै उनले निजी क्षेत्रले हाल भोगिरहेको चुनौतीपूर्ण परिस्थितिको समाधानका लागि महासंघलाई अझ सशक्त र प्रभावकारी बनाउनु आवश्यक रहेको बताएका छन्।
उनका अनुसार वर्तमान समयमा निजी क्षेत्र विभिन्न नीतिगत अन्योल, लगानी असुरक्षा तथा आर्थिक दबाबबाट प्रभावित भइरहेको छ।
“निजी क्षेत्र अहिले अनेक दबाब र अन्योलमा छ। यस्तो अवस्थामा महासंघ व्यवसायीहरूको सशक्त र स्पष्ट आवाज बन्नुपर्छ,” सापकोटाले भने, “म महासंघमा पुगेर नीतिगत स्थायित्व, लगानी सुरक्षा र सहज व्यवसाय वातावरण निर्माणका लागि दृढतापूर्वक काम गर्नेछु।”
सापकोटाले विशेषगरी साना तथा मझौला उद्यमीहरूको संरक्षण, उत्पादनमूलक क्षेत्रको प्रवर्द्धन तथा पर्यटन र सेवा क्षेत्रको पुनरुत्थानलाई आफ्नो प्राथमिकतामा राखेका छन्।
साथै, प्रदेशस्तरका व्यवसायीहरूले भोगिरहेका समस्याहरूलाई केन्द्रीय तहसम्म प्रभावकारी रूपमा उठान गरी समाधानको पहल गर्ने आफ्नो प्रतिबद्धता उनले व्यक्त गरेका छन्।
पूर्वी नेपालबाट सुरु भएको आफ्नो व्यावसायिक यात्रालाई राष्ट्रिय नेतृत्वतर्फ विस्तार गर्न अग्रसर सापकोटाको सक्रियताले निजी क्षेत्रभित्र नयाँ आशा र ऊर्जा थपिएको देखिन्छ।
‘मेची क्राउन’मार्फत स्थापित सफलताको अनुभव बोकेका उनी महासंघमा पुगेर समग्र व्यावसायिक वातावरण सुधारमा ठोस योगदान पुर्याउने अपेक्षा गरिएको छ।
अनुभव, स्पष्ट दृष्टिकोण र परिणाममुखी कार्यशैलीको संयोजनका आधारमा बलराम सापकोटा एशोसिएट (खुल्ला) सदस्य पदका लागि एक सशक्त, विश्वसनीय तथा आशालाग्दा उम्मेदवारका रूपमा उदाएका छन्।
महासंघको आगामी नेतृत्व चयन प्रक्रियामा उनको भूमिकाले निजी क्षेत्रको भावी दिशा निर्धारणमा महत्वपूर्ण प्रभाव पार्ने विश्वास गरिएको छ।
प्रकाशित मिति: १४ बैशाख २०८३, सोमबार
प्रतिक्रिया