काठमाडौं । नेकपा (एमाले) का उपाध्यक्ष विष्णु पौडेलले पार्टीलाई पुनर्गठित गर्ने बताएका छन्।
बुधबार २७औं यदु स्मृति दिवस तथा २४औं यदु स्मृति पत्रकारिता पुरस्कार वितरण कार्यक्रममा उनले पछिल्लो निर्वाचनमा पार्टीले व्यहोर्नुपरेको नतिजालाई गम्भीर धक्काका रूपमा स्वीकार गर्दै पार्टीलाई नयाँ सिराबाट पुनर्गठित गर्ने बताएका हुन्।
पौडेलले फागुन २१ गतेको निर्वाचन नतिजालाई लिएर पार्टीभित्र गम्भीर समीक्षा हुने बताए। उनले विगत १० वर्षमा एमालेले दुई तिहाइ नजिकको सरकार बनाउने जस्ता ठूला सफलता प्राप्त गरे पनि अहिलेको पराजयले नयाँ चुनौती खडा गरेको उल्लेख गरे।
आगामी दिनमा ‘जनताको बहुदलीय जनवाद’ को मार्गनिर्देशनमा रहेर पार्टीको नीति र विचारलाई अद्यावधिक गरिने उनले बताए। निराशा र पलायन समस्याको समाधान नभएको भन्दै उनले कार्यकर्ताहरूलाई उच्च मनोबलका साथ सङ्गठन निर्माणमा जुट्न आह्वान गरे।
वर्तमान सरकारले लोकतान्त्रिक मूल्य र मान्यताविपरीत अध्यादेशको बाटो रोजेको भन्दै उनले त्यसमा पार्टीको गम्भीर ध्यानाकर्षण भएको समेत बताए।
प्रकाशित मिति: १६ बैशाख २०८३, बुधबार
प्रतिक्रिया