काठमाडौं। नेकपा एमाले सुदूरपश्चिम प्रदेश संसदीय दलभित्र नेतृत्व परिवर्तनको विषयलाई लिएर विवाद चर्किएपछि पार्टी अध्यक्ष केपी शर्मा ओलीले सक्रियता देखाएका छन् ।
दलको नेता फेर्ने कसरतमा लागेका सुदूरपश्चिमका सांसदहरूलाई छलफलका लागि अध्यक्ष ओलीले भक्तपुरको गुण्डुस्थित आफ्नै निवासमा बोलाएर छलफल गरेका छन् ।
सुदूरपश्चिम प्रदेश सभामा प्रतिनिधित्व गर्ने एमालेका ११ जना सांसदहरू अहिले गुण्डु पुगेर नेतृत्व परिवर्तनको विषयमा छलफल गरिरहेका छन् ।
एमाले सुदूरपश्चिम संसदीय दलको नेतामा हाल राजेन्द्र रावल रहेका छन् ।
तर केही समयदेखि उनलाई हटाएर नयाँ नेता चयन गर्नुपर्ने माग गर्दै सांसदहरूले आन्तरिक छलफल र दबाब बढाउँदै लगेका थिए ।
संसदीय दलभित्रको यो किचलोले पार्टीको प्रदेश संरचनामा नै असर पर्न सक्ने देखिएपछि अध्यक्ष ओलीले उनीहरूसँग प्रत्यक्ष कुराकानी गर्न लागेका हुन् ।
अध्यक्ष ओलीले सांसदहरूका असन्तुष्टि सुन्ने र पार्टीको आन्तरिक एकता कायम राख्न निर्देशन दिने बुझिएको छ ।
सुदूरपश्चिमको यो विवादले केन्द्रीय राजनीति र प्रदेश सरकारको समीकरणमा समेत प्रभाव पार्न सक्ने भएकाले यो छलफललाई महत्वपूर्ण रूपमा हेरिएको छ ।
प्रकाशित मिति: २३ बैशाख २०८३, बुधबार
प्रतिक्रिया