काठमाडौं। नेपाली चलचित्र लालीबजार आगामी शुक्रबारदेखि देशभर प्रदर्शनमा आउने भएको छ।
उच्च अदालत पाटनले यसअघि दिएको प्रदर्शन रोकसम्बन्धी अल्पकालीन अन्तरिम आदेशलाई निरन्तरता दिन अस्वीकार गरेपछि फिल्म प्रदर्शनको बाटो खुलेको हो।
चलचित्रका कार्यकारी निर्माता प्रदीप भट्टराईले अदालतको निर्णयपछि फिल्म निर्धारित समयमै रिलिज गर्न लागिएको जानकारी दिएका छन्।
यसअघि वैशाख १८ गते प्रदर्शनको तयारीमा रहेको फिल्म अदालतको आदेशका कारण स्थगित भएको थियो।
बादी समुदायको कथामा आधारित यस चलचित्रमा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, आशा पौडेल, गोविन्द सुनार, आभा अर्याल, तारा शर्मा, रमेश वादी र सरस्वती अधिकारीलगायत कलाकारहरूको अभिनय रहेको छ।
षड्कोण आर्ट्सको निर्माणमा बनेको यस फिल्ममार्फत विशाल देवकोटा र प्रशंसा सुवेदीले डेब्यु गरेका छन् भने निर्देशन यम थापाले गरेका हुन्।
अदालतको निर्णयसँगै चलचित्र ‘लालीबजार’ को प्रदर्शनलाई लिएर देखिएको अन्योल अन्त्य भएको छ र दर्शकले अब फिल्म हलमा हेर्न पाउने भएका छन्।
प्रकाशित मिति: २३ बैशाख २०८३, बुधबार
प्रतिक्रिया