काठमाडौं। रवि लामिछाने ले नेपालमा अहिले देखिएको राजनीतिक परिवर्तन र तुलनात्मक सहज अवस्थाको आधार विगतका राजनीतिक दलहरूको दीर्घ संघर्ष रहेको बताएका छन्।
राष्ट्रिय स्वतन्त्र पार्टीको दुईदिने प्रशिक्षण कार्यक्रममा बोल्दै उनले पञ्चायतकालीन एकदलीय शासनविरुद्ध नेपाली कांग्रेस, नेकपा (एमाले) तथा विभिन्न वामपन्थी दलहरूले दशकौँसम्म निरन्तर संघर्ष गरेको स्मरण गरे।
उनले तत्कालीन राजनीतिक नेतृत्वले परिवर्तन सम्भव हुन्छ कि हुँदैन भन्ने निश्चितता नहुँदाहुँदै पनि जोखिम मोलेर आन्दोलन अघि बढाएको बताए।
“त्यो समय नेताहरूले परिवार, बालबालिका र व्यक्तिगत जीवनभन्दा माथि उठेर राजनीतिक परिवर्तनका लागि संघर्ष गरेका थिए,” उनले भने।
लामिछानेका अनुसार तत्कालीन अवस्थामा राजनीतिक गतिविधिमा संलग्न व्यक्तिहरू लुकेर हिँड्नुपर्ने, पक्राउ पर्ने डर झेल्नुपर्ने र शिक्षासमेत सहज रूपमा प्राप्त गर्न नसक्ने परिस्थिति थियो।
तर पनि उनीहरूले करिब तीन दशकसम्म निरन्तर आन्दोलन जारी राखेका थिए।
उनले माओवादी सशस्त्र आन्दोलनको प्रसङ्गसमेत उल्लेख गर्दै त्यस क्रममा पनि धेरै नेता तथा कार्यकर्ताले ज्यानको जोखिम उठाएर राजनीतिक परिवर्तनका लागि संघर्ष गरेको बताए।
“परिवर्तन आउँछ कि आउँदैन भन्ने निश्चितता नभए पनि उनीहरू आन्दोलनमा लागिरहे,” उनले भने।
वर्तमान राजनीतिक अवस्थालाई विगतको तुलनामा सहज भन्दै लामिछानेले अहिले जनमतमार्फत परिवर्तन सम्भव हुने अवस्था बनेको धारणा राखे।
उनका अनुसार अहिले राजनीतिक दलहरू चुनावमार्फत बहुमत प्राप्त गर्न सकिने विश्वाससहित अघि बढ्न सक्छन्, जुन विगतमा सम्भव थिएन।
उनले वर्तमान पुस्ताले विगतका संघर्षको मूल्य बुझेर अब परिणाममुखी काममा केन्द्रित हुनुपर्ने आवश्यकता औँल्याए।
“हामीले अहिले पाएको राजनीतिक वातावरण विगतका कठिन संघर्षको उपलब्धि हो,” उनले बताए।
प्रकाशित मिति: २७ बैशाख २०८३, आइतबार
प्रतिक्रिया