काठमाडौं। नेपाली कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले नेपाली राजनीतिमा चलिरहेको “पुराना र नयाँ” भन्ने भाष्यलाई अस्वीकार गर्दै बहसलाई सही र गलतको आधारमा अघि बढाउनुपर्ने बताएका छन्।
मंगलबार प्रतिनिधि सभालाई सम्बोधन गर्दै उनले सबै पुराना दल र नेतृत्वलाई एउटै नजरले मूल्याङ्कन गर्ने प्रवृत्ति गलत भएको दाबी गरे।
उनका अनुसार राजनीतिक मूल्यांकन उमेर वा पुस्ताको आधारमा होइन, कार्य र नीतिको सही–गलत पक्षका आधारमा हुनुपर्छ।
प्रचण्डले अहिले समाजमा “पुराना सबै खराब” भन्ने धारणा बनाउने प्रयास भइरहेको भन्दै त्यसले राजनीतिक विभाजन मात्र बढाउने टिप्पणी गरे।
उनले भने, “सवाल पुराना र नयाँको होइन, सवाल सही र गलतको हो।”
उनले आफूलाई समेत गलत ढङ्गले एउटै डालोमा राखेर आलोचना गर्ने प्रवृत्तिप्रति आपत्ति जनाए।
सम्बोधनका क्रममा उनले राष्ट्रिय स्वतन्त्र पार्टीसँगको विगतको सहकार्यलाई पनि स्मरण गरे।
सुशासन, सेवा प्रवाह सुधार, मेरिटोक्रेसी लागू गर्ने प्रयास, तथा ठूला भ्रष्टाचार प्रकरणहरूमा अनुसन्धान अघि बढाउने विषयमा सहकार्य भएको उनको दाबी थियो।
उनले आफ्नो दल सानो भए पनि संसदमा बेथिति र विकृतिविरुद्ध प्रभावकारी भूमिका खेलेको बताए।
प्रचण्डले वर्तमान संसदलाई “शहीदहरूको बलिदानबाट बनेको संरचना” भन्दै यसको ऐतिहासिक महत्व स्मरण गर्नुपर्ने बताए।
उनले संसदलाई केवल भौतिक संरचना नभई राजनीतिक संघर्ष र परिवर्तनको प्रतीकका रूपमा व्याख्या गरे।
उनले संसदमा विविध समुदायको प्रतिनिधित्वलाई सकारात्मक उपलब्धि मानेको उल्लेख गर्दै यसलाई नेपाली राजनीतिमा भएको ऐतिहासिक परिवर्तनको परिणामका रूपमा चित्रण गरे।
सम्बोधनको अन्त्यतिर उनले शान्ति प्रक्रिया, आन्दोलन र परिवर्तनका चरणहरूलाई स्मरण गर्दै ती सबैको योगदानले नै वर्तमान राजनीतिक व्यवस्था सम्भव भएको बताए।
प्रकाशित मिति: २९ बैशाख २०८३, मंगलबार
प्रतिक्रिया