लन्डन। बेलायतका पूर्वस्वास्थ्य मन्त्री वेस स्ट्रिटिङ ले प्रधानमन्त्री किर स्टार्मरविरुद्ध लेबर पार्टीको आगामी नेतृत्व प्रतिस्पर्धामा उम्मेदवारी दिने घोषणा गरेका छन्।
उनले लेबर पार्टीभित्र वास्तविक प्रतिस्पर्धा आवश्यक रहेको बताउँदै आफू पनि सो दौडमा सहभागी हुने स्पष्ट पारेका हुन्।
लेबर समर्थकहरूको प्रगतिशील समूह ‘प्रोग्रेस’को सम्मेलनमा सम्बोधन गर्दै स्ट्रिटिङले “उत्कृष्ट उम्मेदवारहरूबीच प्रतिस्पर्धा हुनुपर्छ” भन्दै नेतृत्व परिवर्तनको सम्भावनालाई खुला राख्नुपर्ने धारणा राखे।
केही दिनअघि मन्त्री पदबाट राजीनामा दिएका स्ट्रिटिङले तत्कालीन प्रधानमन्त्री स्टार्मरलाई पदत्यागको समयसीमा तय गर्नसमेत आग्रह गरेका थिए।
उनले आफ्नो सम्बोधनमा सन् २०१६ मा भएको ब्रेक्जिट निर्णयलाई “गम्भीर गल्ती” भन्दै कडा आलोचना गरे।
उनका अनुसार ब्रेक्जिटपछि बेलायतको आर्थिक तथा औद्योगिक अवस्था कमजोर बनेको छ।
स्ट्रिटिङले बेलायतले भविष्यमा पुनः युरोपेली सङ्घमा फर्किने लक्ष्य राख्नुपर्ने समेत बताए।
यद्यपि प्रधानमन्त्री स्टार्मरले यसअघि नै ब्रेक्जिटपछि पुनः युरोपेली सङ्घमा फर्कने कुनै योजना नरहेको र आप्रवासनजस्ता विषयमा ठूला सम्झौता नगर्ने स्पष्ट गरिसकेका छन्।
यसैबीच, ग्रेटर म्यानचेस्टरका मेयर एन्डी बर्नह्यामले पनि संसद् सदस्य बन्ने उद्देश्यसहित खाली सिटमा चुनाव लड्ने घोषणा गरेका छन्।
सांसद बन्नु लेबर पार्टीको नेतृत्व चुनौती दिन आवश्यक आधार मानिन्छ।
हालै सम्पन्न स्थानीय निर्वाचनमा लेबर पार्टीले अपेक्षाअनुसार नतिजा ल्याउन नसकेपछि प्रधानमन्त्री स्टार्मरमाथि राजीनामाको दबाब बढिरहेको छ।
तर उनले पद नछोड्ने स्पष्ट संकेत दिएका छन्। पार्टी नियमअनुसार नेतृत्व परिवर्तनको प्रक्रिया सुरु गर्न कम्तीमा २० प्रतिशत सांसदको समर्थन आवश्यक पर्छ।
प्रकाशित मिति: ३ जेष्ठ २०८३, आइतबार
प्रतिक्रिया