काठमाडौं। युक्रेन को ओडेसा क्षेत्रस्थित बन्दरगाह नजिक भएको ड्रोन आक्रमणमा चिनियाँ स्वामित्वको मालवाहक जहाज क्षतिग्रस्त भएको छ।
यो घटना भ्लादिमिर पुटिन र सि जिनपिङ बीच भेटवार्ताका लागि पुटिन बेइजिङ जानुअघि भएको अन्तर्राष्ट्रिय सञ्चारमाध्यमहरूले जनाएका छन्।
युक्रेनी बन्दरगाह प्राधिकरणका अनुसार सोमबार भएको आक्रमणमा दुईवटा नागरिक जहाज निशानामा परेका थिए।
तीमध्ये एउटा मार्सल आइल्यान्ड्सको झन्डा बोकेको ‘केएसएल देयाङ’ नामक जहाज रहेको बताइएको छ, जुन चिनियाँ स्वामित्वमा सञ्चालन भइरहेको मालवाहक जहाज हो।
अर्को जहाज गिनी–बिसाउको झन्डामुनि सञ्चालन भइरहेको जनाइएको छ।
रुस को आक्रमणपछि जहाजको एक भागमा आगलागी भएको तस्बिर सार्वजनिक भएको छ।
यद्यपि जहाजमा रहेका चालक दलका सदस्य सुरक्षित रहेको युक्रेनी अधिकारीहरूले बताएका छन्।
भ्लोदिमिर जेलेन्स्की ले सामाजिक सञ्जालमार्फत प्रतिक्रिया दिँदै रुसले बन्दरगाह क्षेत्र र नागरिक जहाजलाई लक्षित गर्दै आक्रमण गरेको आरोप लगाएका छन्।
उनका अनुसार आक्रमणमा कुनै पनि चालक दल सदस्य घाइते भएका छैनन्।
युक्रेनी नौसेनाका प्रवक्ताले जहाजमा रहेका सबै चालक दल चिनियाँ नागरिक भएको र उनीहरू सुरक्षित रहेको जानकारी दिएका छन्।
आक्रमणपछि पनि जहाज आफ्नो गन्तव्यतर्फ अघि बढिरहेको बताइएको छ।
रिपोर्टअनुसार उक्त जहाज आक्रमणका बेला खाली अवस्थामा थियो र ओडेसा क्षेत्रको पिभ्डेनी बन्दरगाहबाट फलाम खनिज लोड गर्ने तयारीमा रहेको थियो।
विश्लेषकहरूका अनुसार ओडेसा क्षेत्र युक्रेनको कृषि उत्पादन तथा निर्यातका लागि अत्यन्त महत्वपूर्ण समुद्री मार्ग हो।
रुस–युक्रेन युद्ध सुरु भएयता यस क्षेत्रका बन्दरगाहहरूमा पटक–पटक आक्रमण हुँदै आएका छन्।
प्रकाशित मिति: ४ जेष्ठ २०८३, सोमबार
प्रतिक्रिया