काठमाडौँ । बुधबार सुदूरपश्चिम र लुम्बिनी प्रदेशका तराई भू–भागमा अत्यधिक गर्मी हुने पूर्वानुमान गरिएको छ।
मौसम पूर्वानुमान महाशाखाका अनुसार आज दिउँसो यी क्षेत्रहरूमा तापक्रम उल्लेख्य रूपमा बढ्नेछ। पश्चिम तराईका अधिकांश सहरमा कडा घाम लाग्ने र अत्यधिक गर्मी महसुस हुने सम्भावना छ।
आज सबैभन्दा बढी गर्मी धनगढीमा हुने अनुमान गरिएको छ, जहाँ अधिकतम तापक्रम ३९ देखि ४१ डिग्री सेल्सियससम्म पुग्न सक्छ। नेपालगञ्जमा ३८ देखि ४० डिग्री, दिपायलमा ३७ देखि ३९ डिग्री तथा भैरहवा र वीरेन्द्रनगरमा ३६ देखि ३८ डिग्री सेल्सियससम्म तापक्रम रहने पूर्वानुमान छ। यी क्षेत्रमा वर्षाको सम्भावना नहुँदा दिउँसो अत्यधिक गर्मी रहनेछ।
तराईमा गर्मी बढिरहँदा देशका पहाडी तथा पूर्वी भू–भागमा भने मेघगर्जन र चट्याङसहित वर्षाको सम्भावना रहेको छ। काठमाडौँसहित पोखरा, सिमरा, ओखलढुङ्गा, धनकुटा, विराटनगर, धरान, जिरी र ताप्लेजुङमा हल्कादेखि मध्यम वर्षा हुन सक्ने अनुमान छ। विशेषगरी ओखलढुङ्गा, धनकुटा र ताप्लेजुङमा मध्यम वर्षाको सम्भावना करिब ४० प्रतिशत रहेको जनाइएको छ। काठमाडौँको अधिकतम तापक्रम आज २७ देखि २९ डिग्री सेल्सियसको बीचमा रहनेछ।
रातिको मौसम हेर्दा सुदूरपश्चिमका डडेल्धुरा, दिपायल र धनगढी लगायतका सहरहरूमा आकाश सामान्यतया सफा रहनेछ। तर मध्य तथा पूर्वी क्षेत्रका धेरै स्थानमा राति पनि आंशिक बदली तथा वर्षाको सम्भावना रहनेछ।
पोखरा, सिमरा, ओखलढुङ्गा, धनकुटा, विराटनगर, धरान, जनकपुर र ताप्लेजुङमा राति पनि मेघगर्जन र चट्याङसहित हल्का वर्षा हुन सक्नेछ। जोमसोम र जुम्ला लगायतका पहाडी तथा हिमाली जिल्लामा भने आज दिउँसो र राति आकाश आंशिकदेखि सामान्यतया बदली रहने अनुमान गरिएको छ।
प्रकाशित मिति: ६ जेष्ठ २०८३, बुधबार
प्रतिक्रिया