काठमाडौं। सूचना तथा सञ्चारमन्त्री डा. विक्रम तिमिल्सिनाले प्रेस स्वतन्त्रता प्रति सरकार पूर्ण रूपमा प्रतिबद्ध रहेको स्पष्ट पारेका छन् ।
प्रतिनिधिसभामा मन्त्रालयसँग सम्बन्धित प्रश्नहरूको जवाफ दिँदै उनले सरकारले प्रेसलाई नियन्त्रण गर्ने कुनै मनसाय नराखेको बताएका छन् ।
उनले संविधानले नै प्रेस स्वतन्त्रताको अधिकार सुनिश्चित गरेको उल्लेख गर्दै त्यसलाई कुनै पनि अवस्थामा कुण्ठित गर्न नसकिने बताए ।
तर, मन्त्री तिमिल्सिनाले प्रेस स्वतन्त्रता “स्वच्छन्दता” नभएको भन्दै पत्रकारिताले आफ्नो मर्यादा, गरिमा र सीमा कायम राख्नुपर्नेमा जोड दिए ।
उनले भने, “प्रेस स्वतन्त्रताको अधिकार संविधानले दिएको हो।
आज, भोलि र पर्सी कसैले यो अधिकार कुण्ठित गर्न सक्दैन तर प्रेस स्वतन्त्रता स्वच्छन्दता भने हुँदैन।
प्रेसले आफ्नो गरिमा र सीमालाई कायम राख्न सक्नुपर्छ।”
उनका अनुसार प्रेसले आफ्नो जिम्मेवारी र मर्यादा कायम राख्दै काम गर्दा सरकारको हस्तक्षेप आवश्यक नपर्ने अवस्था सिर्जना हुन्छ ।
मन्त्री तिमिल्सिनाले प्रेस काउन्सिल नेपाल र चलचित्र सेन्सर बोर्डलाई अझ सक्षम र प्रभावकारी बनाउन सरकार प्रतिबद्ध रहेको पनि बताए ।
साथै, मन्त्रालयसँग सम्बन्धित नीति तथा बजेटका प्राथमिकताबारे उठाइएका सुझावलाई सरकारले गम्भीर रूपमा लिने उनले विश्वास दिलाए ।
प्रकाशित मिति: ६ जेष्ठ २०८३, बुधबार
प्रतिक्रिया