काठमाडौं। पाल्पाको तिनाउ गाउँपालिका–३ स्थित तिनाउ खोला ड्याममा पौडी खेल्ने क्रममा डुबेर बेपत्ता भएका एक भारतीय युवक मृत अवस्थामा फेला परेका छन्।
जिल्ला प्रहरी कार्यालय पाल्पाका अनुसार भारतको सिद्धार्थनगर जिल्लाको नौगढ गाउँका अन्दाजी २२ वर्षीय सौरभ रस्तोगी मृत फेला परेका हुन्।
उनी बुधबार साँझ करिब ६ः३० बजे साथीहरूसँग घुम्न आएका बेला ड्याममा पौडी खेल्ने क्रममा डुबेर बेपत्ता भएका थिए।
घटनापछि प्रहरी चौकी दोभानबाट खटिएको टोलीसहित नेपाल प्रहरी र सशस्त्र प्रहरी बलको संयुक्त टोलीले रातभर खोजतलास गरेको थियो।
प्रहरीका अनुसार आज घटनास्थलदेखि करिब ५० मिटर दक्षिणतर्फ तिनाउ नदीको ढुङ्गाको खोँचमा अड्किएको अवस्थामा रस्तोगीको शव फेला परेको हो।
जिल्ला प्रहरी कार्यालय पाल्पाका डीएसपी भीमलाल भट्टराईले घटनाबारे थप अनुसन्धान भइरहेको जानकारी दिएका छन्।
प्रकाशित मिति: ८ जेष्ठ २०८३, शुक्रबार
प्रतिक्रिया