तस्बिर : सशस्त्र प्रहरी
काठमाडौं । पूर्व गृहमन्त्री सुधन गुरुङ र सशस्त्र प्रहरी बलका महानिरीक्षक नारायणदत्त पौडेलले नेपाल एपीएफ अस्पताल बलम्बु पुगेर उपचाररत सशस्त्र प्रहरी जवानहरूको स्वास्थ्य अवस्थाबारे जानकारी लिएका छन्।
सशस्त्र प्रहरी बलले सामाजिक सञ्जालमार्फत दिएको जानकारीअनुसार उनीहरू शुक्रबार अस्पताल पुगेर तालिमका क्रममा बेहोस भएका प्रशिक्षार्थीहरूको उपचार र स्वास्थ्य प्रगतिबारे चिकित्सकसँग छलफल गरेका हुन्।
कैलालीको टीकापुरस्थित तालिम केन्द्रमा अभ्यासका क्रममा ६ जना प्रशिक्षार्थी अचानक बेहोस भएपछि उनीहरूलाई थप उपचारका लागि काठमाडौं ल्याइएको थियो।
हाल उपचाररत सबै प्रशिक्षार्थीको होस खुलेको सशस्त्र प्रहरीले जनाएको छ। उनीहरूको स्वास्थ्य अवस्था सुधारोन्मुख रहेको पनि बताइएको छ।
प्रकाशित मिति: ९ जेष्ठ २०८३, शनिबार
प्रतिक्रिया