काठमाडौं । नेकपा एमालेको सचिवालय बैठक तेस्रो दिन पनि जारी रहेको छ । पार्टीभित्र नेतृत्व, संगठन र आगामी रणनीतिका विषयमा नेताहरूबीच तीव्र बहस भइरहेको बताइएको छ ।
आजको बैठकमा अध्यक्ष केपी शर्मा ओलीले पार्टीको केन्द्रीय कमिटी बैठक बोलाउनुपर्ने प्रस्ताव अघि सारेका छन् । विकसित राजनीतिक परिस्थितिबारे व्यापक छलफल आवश्यक रहेको भन्दै उनले केन्द्रीय कमिटीमार्फत निर्णय प्रक्रियालाई अघि बढाउनुपर्ने धारणा राखेको स्रोतले जनाएको छ ।
यता, सचिवालयका केही नेताहरूले भने नेतृत्व परिवर्तनको आवश्यकता औँल्याउँदै ओलीको बहिर्गमनको माग गरेका छन् । पार्टीभित्र देखिएको विवाद र असन्तुष्टिलाई समाधान गर्न नेतृत्वमा नयाँ पुस्तालाई अवसर दिनुपर्ने आवाज बैठकमा उठेको बताइएको छ ।
बैठकमा नेताहरूले आ–आफ्नो धारणा राख्ने क्रम जारी रहेकाले निष्कर्षमा पुग्न अझै समय लाग्ने देखिएको छ ।
प्रकाशित मिति: १० जेष्ठ २०८३, आइतबार
प्रतिक्रिया