काठमाडौं। सप्तरीमा दुईवटा भैंसी चोरी गरेको आरोपमा एक युवक पक्राउ परेका छन्।
जिल्ला प्रहरी कार्यालय सप्तरीले बोदेबरसाइन नगरपालिका–५ जाँजर निवासी १९ वर्षीय शिवकुमार सदालाई पक्राउ गरी अनुसन्धान अघि बढाएको जनाएको छ।
प्रहरीका अनुसार मंगलबार मध्यराति डाक्नेश्वरी नगरपालिका–५ पातो सुन्दरपुर टोलस्थित मदनेश्वर सदाको गोठबाट दुईवटा भैंसी चोरी भएको सूचना प्राप्त भएपछि खोजतलास अभियान सञ्चालन गरिएको थियो।
खोजीका क्रममा बोदेबरसाइन नगरपालिका–१० खडकपुर टोलस्थित हुलाकी सहायक खण्डअन्तर्गतको भित्री सडकमा भैंसी डोर्याउँदै हिँडिरहेको अवस्थामा शिवकुमार सदालाई नियन्त्रणमा लिइएको जिल्ला प्रहरी कार्यालय सप्तरीका निमित्त सूचना अधिकारी प्रहरी निरीक्षक विजय कार्कीले जानकारी दिए।
प्रहरीले पक्राउ परेका सदाविरुद्ध चोरी कसूरअन्तर्गत मुद्दा दर्ता गरी सप्तरी जिल्ला अदालतबाट पाँच दिनको म्याद थप अनुमति लिएर थप अनुसन्धान गरिरहेको जनाएको छ।
घटनाको अर्को पाटो पनि सार्वजनिक भएको छ। प्रहरीको नियन्त्रणमा पर्नुअघि स्थानीयवासीले सदालाई रोकेर सोधपुछ गरेका थिए।
सो क्रममा उनले आफूलाई ५०० रुपैयाँ ज्याला दिने प्रलोभन देखाएर जाँजरकै मोहम्मद जमिल नामक व्यक्तिले भैंसी चोरी गर्न लगाएको बताएका थिए।
सदाले स्थानीयवासीसमक्ष दिएको भनिएको बयानअनुसार प्रहरी देखेपछि जमिलले आफूलाई भाग्न निर्देशन दिएको समेत दाबी गरेका छन्।
यद्यपि, उक्त दाबीबारे प्रहरीले थप अनुसन्धान गरिरहेको जनाएको छ।
प्रहरीले घटनामा अन्य व्यक्तिको संलग्नता रहेको वा नरहेको विषयमा पनि अनुसन्धान जारी रहेको बताएको छ।
चोरी भएका दुवै भैंसी बरामद गरिएको प्रहरीले जनाएको छ।
यस घटनाले ग्रामीण क्षेत्रमा पशुचोरीका घटनाप्रति पुनः चिन्ता बढाएको छ भने दोषीमाथि कानुनी कारबाही गर्न स्थानीयवासीले माग गरेका छन्।
प्रकाशित मिति: १६ जेष्ठ २०८३, शनिबार
प्रतिक्रिया