काठमाडौं । प्रतिनिधिसभाको नयाँ नियमावली विपक्षी दलहरूको विरोधका बीच पारित भएपछि त्यसविरुद्ध कानुनी उपचार खोज्ने विषयमा विपक्षी दलहरू आन्तरिक छलफलमा जुटेका छन्। नियमावली पारित गर्ने प्रक्रियामाथि प्रश्न उठाउँदै उनीहरूले सर्वोच्च अदालत जाने विकल्पबारे समेत विचार गरिरहेका छन्।
सोमबार बिहान कांग्रेस संसदीय दलको कार्यालय सिंहदरबारमा बसेको विपक्षी दलहरूको बैठकमा यस विषयमा विस्तृत छलफल भएको नेताहरूले बताएका छन्। बैठकमा सहभागी एमालेका प्रमुख सचेतक ऐन महरका अनुसार विपक्षी दलहरूले प्रतिनिधिसभा नियमावली–२०८३ को केही व्यवस्थाप्रति गम्भीर असहमति जनाएका छन्।
महरले नियमावली संविधानको भावना र व्यवस्थाभन्दा बाहिर गएर बनाइएको दाबी गर्दै विशेषगरी नियमावलीको नियम २५९ प्रति विपक्षी दलहरूको आपत्ति रहेको बताए। उनका अनुसार उक्त व्यवस्थाले प्रतिनिधिसभाका सदस्यहरूलाई विशेष अधिकार दिने प्रावधान समेटेकाले त्यसबारे कानुनी परीक्षण आवश्यक रहेको विपक्षी दलहरूको निष्कर्ष छ।
‘नियमावली निर्माण र पारित गर्ने प्रक्रियामा पनि पर्याप्त सहमति खोजिएन। त्यसैले अदालत जाने विषयमा छलफल भइरहेको छ,’ महरले भने।
आइतबार प्रतिनिधिसभाको बैठकमा विपक्षी दलहरूको नाराबाजी र विरोध जारी रहेकै अवस्थामा सभामुख डोलप्रसाद अर्यालले प्रतिनिधिसभा नियमावली–२०८३ पारित भएको घोषणा गरेका थिए।
संसदीय अभ्यासअनुसार संसद्को कार्यसञ्चालनलाई व्यवस्थित गर्ने नियमावली सकेसम्म सर्वसम्मतिबाट पारित गर्ने परम्परा रहँदै आएको छ। विषयवस्तुमा मतभेद भए पनि प्रक्रियागत सहमति खोज्ने अभ्यासलाई बेवास्ता गर्दै नियमावली पारित गरिएको भन्दै विपक्षी दलहरूले असन्तुष्टि व्यक्त गरेका छन्।
नेकपाका सांसद गोपाल शर्माले पनि नियमावलीका केही प्रावधान संविधानसँग बाझिएको आशंका व्यक्त गर्दै त्यसबारे कानुनी प्रश्न उठ्न सक्ने बताए। उनले कानुनी उपचारको विकल्पबारे निर्णय गर्न पार्टी संसदीय दलको बैठक बोलाइएको जानकारी दिए।
‘संविधान र कानुनभन्दा माथि कोही हुन सक्दैन। यदि कुनै व्यवस्था संविधानसँग बाझिन्छ भने त्यसको कानुनी परीक्षण आवश्यक हुन्छ,’ शर्माले भने, ‘सभामुखले अपनाएको प्रक्रिया र नियमावली पारित गर्ने शैलीबारे पनि गम्भीर समीक्षा हुनुपर्छ।’
विपक्षी दलहरूले अबको रणनीति तय गर्न थप परामर्श जारी राखेका छन् भने नियमावलीविरुद्ध अदालत जाने विषयमा अन्तिम निर्णय केही दिनभित्र हुन सक्ने संकेत दिएका छन्।
प्रकाशित मिति: १८ जेष्ठ २०८३, सोमबार
प्रतिक्रिया