काठमाडौं। नेकपा (एमाले) ले केन्द्रीय संगठन विभागको आयोजनामा दुई दिने राष्ट्रिय कार्यशाला बुधबारदेखि सुरु गर्ने भएको छ।
‘सदस्यता नवीकरण तथा विस्तार उत्प्रेरणा’ शीर्षकमा आयोजना हुने उक्त कार्यशाला जेठ २० र २१ गते सञ्चालन हुनेछ।
कार्यशालाको उद्घाटन पार्टी अध्यक्ष केपी शर्मा ओलीले बुधबार बिहान ११ बजे काठमाडौँको बबरमहलस्थित कार्की बैंक्वेटमा गर्ने कार्यक्रम तय गरिएको एमाले प्रचार विभागले जनाएको छ।
उद्घाटनसँगै कार्यशालाको औपचारिक सुरुवात हुनेछ।
पार्टीका अनुसार यो कार्यक्रम संगठनात्मक सुदृढीकरण, सदस्यता व्यवस्थापन तथा पार्टी संरचनालाई थप प्रभावकारी बनाउने उद्देश्यले आयोजना गरिएको हो।
कार्यशालामा सदस्यता विस्तार, नवीकरण प्रक्रिया र संगठनात्मक सुधारका भावी योजनाबारे विस्तृत छलफल तथा अभिमुखीकरण हुने बताइएको छ।
फागुन २१ पछि हुने भनिएको निर्वाचनपछिको पहिलो सार्वजनिक कार्यक्रमका रूपमा अध्यक्ष ओलीको उपस्थिति रहने भएकाले यस कार्यशालालाई विशेष रूपमा हेरिएको छ।
पार्टी नेतृत्वको सहभागिताले संगठनभित्र नयाँ ऊर्जा र दिशानिर्देश दिने अपेक्षा गरिएको छ।
कार्यशालामा सबै प्रदेश तथा जिल्ला इन्चार्जहरू (भारत प्रवाससहित) सहभागी हुनेछन्।
त्यस्तै प्रदेश कमिटी वा सो सरहका पदाधिकारी, कार्यालय सचिव, जिल्ला कमिटीका अध्यक्ष तथा संगठन विभाग प्रमुखहरूको पनि अनिवार्य उपस्थिति रहनेछ।
यसका अतिरिक्त जनसंगठनका केन्द्रीय कमिटी अध्यक्ष तथा संगठन विभाग प्रमुखहरू समेत कार्यक्रममा सहभागी हुने एमालेले जनाएको छ।
दुई दिने कार्यशालामा पार्टी सदस्यता विस्तार, नवीकरण प्रक्रिया र संगठन सुदृढीकरणका रणनीतिहरूबारे सघन छलफल हुने बताइएको छ।
साथै संगठनलाई थप सक्रिय, व्यवस्थित र जनमुखी बनाउने विषयमा समेत अभिमुखीकरण गरिनेछ।
एमालेले यो कार्यशालालाई आगामी राजनीतिक र संगठनात्मक अभियानका लागि दिशानिर्देश गर्ने महत्वपूर्ण कार्यक्रमका रूपमा लिएको छ।
प्रकाशित मिति: १९ जेष्ठ २०८३, मंगलबार
प्रतिक्रिया