काठमाडौं। श्रम संस्कृति पार्टीका अध्यक्ष हर्क साम्पाङले पार्टीका दुई जना उच्च तहका नेतामाथि कारबाही गर्दै संगठनबाट निष्कासन गरेका छन्।
उनले सामाजिक सञ्जाल फेसबुकमार्फत केन्द्रीय तथा प्रदेश तहका नेताहरूलाई पार्टीबाट हटाइएको जानकारी सार्वजनिक गरेका हुन्।
साम्पाङले सार्वजनिक गरेको पहिलो फेसबुक स्टाटसमा केन्द्रीय समितिका निलम्बित सदस्य पूर्ण गहतराज र प्रदेश समिति सदस्य राखी मेवाहाङलाई पार्टीबाट निष्कासन गरिएको उल्लेख गरेका छन्।
उक्त निर्णयसँगै उनीहरूको पार्टी सदस्यता समेत समाप्त भएको बुझिएको छ।
निष्कासनको घोषणा सार्वजनिक भएसँगै पार्टीभित्र आन्तरिक विवाद चुलिएको र विद्रोहको अवस्था सिर्जना भएको भन्ने चर्चा हुन थालेपछि साम्पाङले पुनः अर्को स्टाटस लेखेर आफ्नो धारणा स्पष्ट पारेका छन्।
उनले दोस्रो स्टाटसमा पार्टीभित्र कुनै विद्रोह वा विभाजनको अवस्था नरहेको दाबी गर्दै कारबाहीलाई अनुशासनसँग जोडेर व्याख्या गरेका छन्।
साम्पाङले लेखेका छन्, “झगडालु २ जनालाई निकालिएको हो, विद्रोह सिद्रोह केही भएको होइन।”
पार्टीभित्र पछिल्लो समय संगठन विस्तार र आन्तरिक व्यवस्थापनका विषयमा विभिन्न मतभेद देखिएको चर्चा भइरहेका बेला अध्यक्ष साम्पाङको यो निर्णयलाई महत्त्वपूर्ण रूपमा हेरिएको छ।
यद्यपि निष्कासित नेताहरूको तर्फबाट हालसम्म औपचारिक प्रतिक्रिया सार्वजनिक भएको छैन।
श्रम संस्कृति पार्टी धरान केन्द्रित वैकल्पिक राजनीतिक अभियानका रूपमा उदाएको भए पनि पछिल्ला महिनाहरूमा संगठन विस्तारसँगै आन्तरिक व्यवस्थापन र नेतृत्व शैलीबारे विभिन्न प्रश्न उठ्दै आएका छन्।
यस्तो अवस्थामा अध्यक्ष साम्पाङले दुई नेतामाथि गरेको कारबाहीले पार्टीभित्रको शक्ति सन्तुलन र आगामी रणनीतिमा प्रभाव पार्ने राजनीतिक विश्लेषकहरूको बुझाइ छ।
कारबाहीको वास्तविक कारण, पार्टीको आन्तरिक निर्णय प्रक्रिया तथा निष्कासित नेताहरूको धारणा सार्वजनिक भएपछि यस विषयमा थप स्पष्टता आउने अपेक्षा गरिएको छ।
प्रकाशित मिति: २० जेष्ठ २०८३, बुधबार
प्रतिक्रिया