दिल्लीबाट रवि लामिछानेको सन्देश: समृद्धिको ढोका खोल्न आएको हुँ, हल्लाको पछाडि नलाग्नू

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो भारत भ्रमण व्यक्तिगत वा पार्टीगत स्वार्थका लागि नभई नेपाल र नेपालीको समृद्धिको साझा एजेन्डा लिएर भएको बताएका छन्। भारतको राजधानी नयाँ दिल्लीमा आयोजित एक कार्यक्रममा सम्बोधन गर्दै उनले सरकार सञ्चालनको प्रारम्भिक चरणमै रहेको उल्लेख गर्दै अफवाह र भ्रमको पछि नलाग्न आग्रह गरेका हुन्।

लामिछानेले विगतमा धेरै नेपाली नेताहरू राजनीतिक उद्देश्य लिएर दिल्ली पुगेको स्मरण गर्दै आफू भने नेपालमा आर्थिक समृद्धिको नयाँ सम्भावना खोज्न आएको बताए। उनका अनुसार भारतसँगको सहकार्यलाई विकास र समृद्धिको आधार बनाउँदै नेपाललाई नयाँ उचाइमा पुर्‍याउने लक्ष्यसहित भ्रमण भइरहेको छ।

उनले आफूसँग कुनै व्यक्तिगत माग वा राजनीतिक सौदाबाजीको एजेन्डा नरहेको स्पष्ट पार्दै आफ्ना सबै प्रयास नेपाल र नेपालीको हितमा केन्द्रित रहेको बताए। भारतले पछिल्लो एक दशकमा हासिल गरेको विकास र आर्थिक प्रगतिलाई उदाहरणका रूपमा प्रस्तुत गर्दै उनले नेपालले पनि अब त्यही गतिमा अघि बढ्नुपर्ने आवश्यकता औँल्याए।

‘हामी छिमेकी मुलुकको विकासलाई टुलुटुलु हेरेर बस्ने अवस्थामा छैनौँ,’ उनले भने, ‘अब संवाद, सहकार्य र आपसी समझदारीमार्फत विकासको साझा यात्रामा अघि बढ्ने समय आएको छ।’

लामिछानेले विभिन्न कूटनीतिक तथा आर्थिक संवादका माध्यमलाई सक्रिय बनाउँदै नेपालको समृद्धिको दीर्घकालीन खाका तयार पार्ने उद्देश्यले भारत भ्रमण गरेको जानकारी दिए। उनले रास्वपा नेतृत्वको सरकार गठन भएको धेरै समय नभएकाले अझै धेरै काम गर्न बाँकी रहेको उल्लेख गरे।

सरकारबारे फैलाइने विभिन्न हल्ला र आशंकाप्रति संकेत गर्दै उनले जनतालाई भ्रममा नपर्न आग्रह गरे। देशलाई सही दिशामा अघि बढाउने स्पष्ट उद्देश्यका साथ सरकार काम गरिरहेको भन्दै उनले विकास, सुशासन र आर्थिक सुधारप्रति आफ्नो प्रतिबद्धता दोहोर्‍याए।

लामिछानेले पुरानो राजनीतिक भागबन्डाको संस्कृतिलाई अन्त्य गर्ने संकल्प व्यक्त गर्दै वर्तमान सरकार पद बाँडफाँटको राजनीतिका लागि नभई नागरिकको जीवनस्तर परिवर्तन गर्न स्थापित भएको बताए।

‘हामी भागबन्डाको राजनीति गर्न होइन, नेपालीको भाग्य बदल्न आएका हौँ,’ उनले भने, ‘यो यात्रा सहज छैन भन्ने हामीलाई थाहा छ। चुनौती धेरै छन्, तर असम्भव केही छैन। लामो यात्राको सुरुआत एउटा पाइला चालेर नै हुन्छ, र हामीले त्यो पाइला चालिसकेका छौँ।’

उनले धैर्य, सहकार्य र दृढ इच्छाशक्तिका साथ अघि बढे नेपाललाई समृद्धिको मार्गमा अघि बढाउन सकिने विश्वास व्यक्त गरे।

प्रकाशित मिति: २१ जेष्ठ २०८३, बिहिबार