काठमाडौं । बितेको २४ घण्टामा काठमाडौं उपत्यका ट्राफिक प्रहरी कार्यालयले २ हजार २५६ जना सवारी चालकलाई सवारी नियम उल्लङ्घन गरेको आरोपमा कारबाही गरेको छ।
यस कारबाहीबाट राज्यकोषमा ४ लाख ९१ हजार ५०० रुपैयाँ राजस्व संकलन भएको छ।
ट्राफिक प्रहरीका अनुसार मादक पदार्थ सेवन गरी सवारी चलाउने १५१ जना, नियमविपरीत राइड सेयरिङ गर्ने १११ जना, ट्राफिक सङ्केत बत्ती उल्लङ्घन गर्ने १४२ जना र तीव्र गतिमा सवारी चलाउने २३० जनालाई कारबाही गरिएको हो।
त्यसैगरी लेन अनुशासन पालना नगर्ने ३३ जना, निषेधित क्षेत्रमा हर्न बजाउने १९३ जना, फुटपाथमा पार्किङ गर्ने ११७ जना, एकतर्फी सडकमा सवारी चलाउने ११८ जना तथा अन्य सवारी नियम उल्लङ्घन गर्ने १ हजार १६१ जनालाई पनि कारबाही गरिएको प्रहरीले जनाएको छ।
प्रहरीले सवारी नियम उल्लङ्घन विरुद्ध निगरानी र कारबाहीलाई थप कडा बनाइने जनाएको छ।
प्रकाशित मिति: २४ जेष्ठ २०८३, आइतबार
प्रतिक्रिया